बुधबार, मंसिर १०, २०७७

भरतपुर विमानस्थल १० दिन बन्द हुँदै

नेपालखोज २०७६ मंसिर १२ गते १३:३०

१२ मंसिर, चितवन । धावनमार्ग (रनवे) ओभरले तथा पार्किङ विस्तारका लागि चितवनको भरतपुर विमानस्थल १० दिन बन्द हुने भएको छ ।
नेपाल नागरिक उड्यन प्राधिकरण भरतपुर विमानस्थल कार्यालयले दिएको जानकारी अनुसार मंसिर १५ गतेबाट २४ गतेसम्म विमानस्थल बन्द हुनेछ । त्यसका लागि विमान कम्पनी तथा अन्य निकायसँग सहमती गरिएको विमानस्थल कार्यालयका प्रमुख पवन गौत्तमले जानकारी दिएका छन् ।

प्राधिकरण कार्यालयले विमानस्थल १० दिन बन्द रहने ‘नोटाम’ जारी गर्दैछ । यो जारी भएपछि विमान कम्पनी तथा चालकहरुलाई भरतपुर विमानस्थलमा काम भइरहेको र हाल बन्द रहेको सूचना जानकारी हुन्छ । ‘मंसिर १५ गतेबाट १० दिन बन्द गरेर करिब १२ सय मिटरको धावनमार्गमा ओभरले गछौं, पार्किङ पनि विस्तार गरेर सुविधायुक्त बनाउँछौं’ विमानस्थल प्रमुख गौतमले भने ‘केही दिन विमानस्थल बन्द हुँदा असुविधा हुने भयो ।’ बुद्ध एयरका भरतपुर इन्चार्ज भक्त बस्नेतले महिनौ दिनसम्म काम गर्नुपर्ने अवस्था आएकोले बरु १० दिन बन्द गरेर भए पनि कामलाई तीव्रता दिने बिषयमा सहमत भएको बताए ।

उनी भन्छन् ‘पहिला आधा फ्लाइट मात्रै गर्न सकिन्छ कि भनेर पनि सोचेको हो, तर बिहान मौसम नखुल्नाले समस्या भयो, त्यो भन्दा बरु बन्द नै गरेर काम गरौं भनेर सहमत भइयो, यसबाट यात्रुलाई परेको असुविधाप्रति क्षमा माग्दै सूचना जारी गछौं ।’ ७०र७० मिटर रहेको पार्किङलाई बढाएर ९०र८० को बनाउन खोजिएको छ । अहिले साना जहाज चारबटा अटेपनि एटिआर र जेट स्टिमहरू एक साइडमा एउटा मात्रै अटाउन सक्छन् एउटा हेलिप्याड छुट्टै तयार हुन्छ । धावनमार्ग ओभरले र पार्किङ क्षेत्र विस्तारका लागि ४ करोड ४२ लाख ४७ हजार ७ सय ८८ रूपैयाँ लागत अनुमान गरिएको छ ।

६२ बिघा क्षेत्रफलमा फैलिएको विमानस्थलको धावनमार्ग एक हजार २ सय मिटर लामो र ३० मिटर चौडा छ । भरतपुरमा बुद्ध, यति र सिम्रिक एयरलाइन्सले उडान गर्ने गरेका छन् । भरतपुर–काठमाडौँ दैनिक ८ र बुद्ध र यतिले भरतपुर–पोखरा एक एक उडान गर्दै आएका छन् । यो विमानस्थलबाट दैनिक ८ सय यात्रुले सेवा लिँदै आएका छन् ।

प्रतिक्रिया