आज र भोलि काठमाडौँका सडक प्रभावित हुँदै

२० मंसिर, काठमाडौँ । काठमाण्डौ उपत्यकामा आज शुक्रबार सवारी आवागमन प्रभावित हुने भएको छ । दक्षिण एसियाली खेलकुद साग अन्तर्गत चक्रपथको कलंकीदेखि कोटेश्वरसम्म ‘साइक्लिङ रेस च्याम्पियनशीप’ हुने भएकाले उपत्यकामा सवारी आवागमन प्रभावित हुने भएको हो ।

बिहान ९ बजेदेखि प्रतियोगिता सुरु हुने भएको र कार्यालय समय पनि सुरु हुने भएकाले शुक्रबार दिउँसोसम्म नै गाडीको चाप हुने देखिएको महानगरिय ट्राफिक प्रहरी महाशाखाले जनाएको छ । शुक्रबार कलंकी–कोटेश्वर सडकखण्डमा ओहोरदोहोर गर्दा सर्भिस लेन प्रयोग गर्न पनि महाशाखाले अनुरोध गरेको छ ।

शनिबार कलंकीदेखि भक्तपुरको सूर्यविनायक सडकखण्डमा खेल हुने भएकाले कलंकीदेखि कोटेश्वर र कोटेश्वरदेखि गठ्ठाघर, सल्लाघारी हुँदै जगाती जाने गाडी चालकलाई जडिबुटी, पेप्सीकोला, पुरानो ठिमी, व्याँसी, कमलविनायक, च्यामसिंह हुँदै जगाती जान पनि ट्राफिक प्रहरीले अनुरोध गरेको छ ।

यस्तै अत्यावश्यक नभए गाडी नचालाउन पनि ट्राफिक प्रहरीले आग्रह गरेको छ । शुक्रबार र शनिबार चक्रपथमा गाडी चलाउँदा ख्याल गर्न र सकेसम्म वैकल्पिक बाटो प्रयोग गर्न महाशाखाले आग्रह गरेको छ ।