कांग्रेस भातृ संगठनको माइतीघरमा प्रदर्शन

काठमाण्डौ । अख्तियार दुरुपयोग अनुसन्धान आयोगले बालुवाटारको ललिता निवासकोे जग्गा आफ्ना सभापतिलाई फसाउन खोजेको भन्दै कांग्रेस भातृ संगठनले राजधानीको माइतीघर मण्डलामा प्रदर्शन गरेको छ ।

नेपाल विद्यार्थी संघको अगुवाइमा भएको प्रदर्शनमा कांग्रेस भातृ संगठन तरुण दल लगायतका संगठनका नेता कार्यकर्ताहरुको सहभागिता रहेको थियो ।

उनीहरुले ‘बालुवाटार जग्गा प्रकरण : आफ्नालाई जोगाउने, अरुलाई फसाउने’, तिलकुमारीलाई जेल, विष्णु पौडेललाई माफी’, क्याबिनेटको निर्णयमा मन्त्री जवाफदेही हुन्छ कि प्रधानमन्त्री’, ‘सरकार तेरो भ्रष्टाचार किन मात्र गच्छदार’ जस्ता नारा लेखिएको प्लेकार्ड बोकेका थिए ।

नेविसंघ र कांग्रेसले देश भ्रष्ट्राचारमुक्त होस् भन्ने चाहेको तर ललिता निवासको जग्गा प्रकरणमा निर्दोषलाई फसाएर दोषीलाई उन्मुक्ति दिन खोजिएकोले विरोध गर्नु परेको नेविसंघका महामन्त्री दीपक भट्टराईले बताए । प्रधानमन्त्रीलाई उन्मुक्ति दिन तर त्यही मन्त्रिपरिषद्का सदस्यमाथि मात्रै मुद्दा दर्ता गर्नु न्याय संगत नभएको भन्दै उनले अन्यायविरुद्ध प्रदर्शनमा उत्रिएको उनको भनाइ छ ।