पाकिस्तानमा वर्षाले १७ जनाको मृत्यु

लाहोर । पाकिस्तानमा परेको मुसलधारे वर्षापछि आएको बाढीका कारण विगत २४ घण्टामा कम्तीमा १७ जनाको मृत्यु भएको स्थानीय सञ्चारमाध्यमले जनाएका छन् ।

मृत्यु हुनेमा महिला तथा बालबालिका रहेका उद्धारमा संलग्न अधिकारीलाई उद्धृत गर्दै पाकिस्तानी सञ्चारमाध्यमले लेखेका छन् । देशको उत्तर–पश्चिमी खैबर पख्तुनख्वा प्रान्तमा मुसलधारे वर्षाको सबैभन्दा नराम्रो प्रभाव परेको बताइएको छ ।

वर्षा र त्यसपछिको बाढी तथा डुबानका कारण खैबर पख्तुनख्वा प्रान्तका विभिन्न ग्रामीण इलाकामा मात्र १२ व्यक्तिको मृत्यु भएको उक्त प्रान्तका विपत् व्यवस्थापन अधिकारी जावद खलिलले बताए ।

उद्धारकर्मीले कैयौँ व्यक्तिलाई घाइते अवस्थामा उद्धार गरेका छन् । वर्षाका कारण कम्तीमा १० घर र एउटा विद्यालयमा क्षति पुगेको बताइएको छ भने ठूलो मात्रामा हिउँदे बाली नष्ट भएको छ ।