पूर्व राजाको तस्बिर अंकित नोट नचलाउन राष्ट्र बैंकको निर्देशन

काठमाडौं । नेपाल राष्ट्र बैंकले पूर्वराजाको तस्बिर अंकित नोट नचलाउन बैंक तथा वित्तीय संस्थालाई निर्देशन दिएको छ।

राष्ट्र बैंकद्वारा जारी निर्देशनमा पूर्वराजाको तस्बीर अंकित नोटलाई बैंकबाट पुनः निष्काशन अयोग्य नोटको रुपमा वर्गिरकरण गर्न र त्यस्ता नोटलाई चलनचल्तिमा नपठाउन भनिएको छ।

त्यस्ता नोट आएको खण्डमा बैंकले रातो रंङको स्लिप प्रयोग गरी नोट कोष तथा राष्ट्र बैंकमा जम्मा गर्नुपर्ने छ। अहिले सर्वसाधारणसँग भएका राजा अंकित नोट बैंकले लिन सक्नेछ भने ति नोट कोषमा जम्मा गर्नु पर्नेछ।

साथै झुत्रिएको, मक्किएको, जलेको, गलेको, लुलो भएको, किराले खाएको, पानीले भिजेको, छपाई बिग्रेको, नोटमा रहेका अक्षर, अंक, चित्र तथा सुरक्षण विशेषताहरु नबुझिने वा नबुझिने गरि रंग लागेको वा च्यातिएको नोटलाई पनि सोही प्रक्रिया अपनाउन राष्ट्र बैंकले बैंक तथा वित्तिय संस्थाहरुलाई भनेको छ।