महोत्तरी क्वारेन्टिनबाट घर फर्केका एक जनाको मृत्यु

जनकपुरधाम । महोत्तरीमा शनिवार क्वारेन्टिनबाट घर फर्केका एक जना पुरूषको मृत्यु भएको छ। गत जेठ ६ गते भारतको हरियाणाबाट महोत्तरी आइपुगेका उनी महोत्तरीको गौशाला नगरपालिकामा रहेको क्वारेन्टिनमा लगभग १८ दिन बसेका थिए।

भारतबाट फर्केका उनीलगायत २६ जनाको पिसिआर परीक्षण गर्दा मृतक पुरुषसहित २० जनाको रिपोर्ट नेगेटिभ र तीन जनाको रिपोर्ट पोजेटिभ आएको नगर प्रमुख शिवनाथ महतोले जानकारी दिए।

उनले भने ‘उनीलगायत अन्य २० जनाको रिपोर्ट नेगेटिभ आएपछि हामीले उनीहरुलाई शनिबार घर पठाएका थियौँ, आइतबार बेलुका उनको मृत्यु भएको छ।’ उनीहरु मध्ये ३ जनाको रिपोर्ट आज आउने नगरप्रमुख महतोले बताए। उनले भने ‘बाँकी ३ जनाको रिपोर्ट आज आउँदै छ, २६ जनै व्यक्तिको स्वाब पिसिआर परीक्षणका लागि काठमाण्डौँको टेकु अस्पतालमा पठाइएको थियो।’

क्वारेन्टिनबाट फर्केका ती ४० वर्षीय पुरुषको मृत्यु भएपछि फेरी पनि उनको स्वाब संकलन गरी परीक्षणका लागि पठाउने मेयर महतोले बताए।