मंगलबार, वैशाख ११, २०८१

भारतीय दुतावासद्वारा साढे ३ करोडको भवन हस्तान्तरण

नेपालखोज २०७७ असार २४ गते १९:५८

काठमाडाैं । नेपाल–भारत मैत्री विकास सहकार्य कार्यक्रमअन्तर्गत ३ करोड ५१ लाखमा निर्माण गरिएको क्याम्पस भवन हस्तान्तरण गरिएको छ । मुगु जिल्लाको रातापानीमा अवस्थित श्री महादेव मस्त चतुर्देव क्याम्पसको प्रशासनिक तथा शैक्षिक भवन विद्यालय व्यवस्थापन समितिलाई  हस्तान्तरण गरियो ।

बुधबार गाउँ विकास परिषद, विद्यालय व्यवस्थापन समिति र काठमाडौंस्थित भारतीय राजदूतावासका प्रतिनिधिहरुद्वारा भिडियो कन्फरेन्स मार्फत भवन उद्घाटन गरियो ।

सन् २००७ मा स्थापना भएको यस क्याम्पस समुदायको स्वामित्वको शैक्षिक संस्थान हो । विश्वविद्यालय अनुदान आयोग (युजिसी)बाट स्वीकृति प्राप्त सो क्याम्पस त्रिभुवन विश्वविद्यालयसँग आबद्घ रहेको छ । क्याम्पसले चार वर्षे स्नातक तहको पठनपाठन सञ्चालन गरेको छ । हुम्ला र बाजुरालगायत २४ भन्दा बढी गाविसका विद्यार्थीहरु अध्ययनरत यस क्याम्पसमा योग्य विद्यार्थीहरुका लागि विविध छात्रवृत्तिको व्यवस्था पनि रहेको छ ।

नयाँ प्रशासकीय तथा शैक्षिक भवन निर्माणको कार्यान्वयन जिल्ला समन्वय समितिले गरेको हो । यस नवनिर्मित संरचनाले विद्यार्थीहरुको सिकाई वातावरणलाई अभिवृद्धि गर्ने अपेक्षा गरिएको छ ।

प्रतिक्रिया