आगामी तीन दिन देशका अधिकांश क्षेत्रको मौसम प्रभावित

काठमाडौं । जल तथा मौसम पूर्वानुमान महाशाखाले सोमबारसम्म देशभर आंशिकदेखि सामान्य बदली रहने जनाएको छ ।

शनिबार बिहान दैनिक बुलेटिन जारी गर्दै महाशाखाले दक्षिण पूर्वी अरब सागरमा बनेको न्यून चापीय क्षेत्र तथा पूर्वी बिहारमा बनेको न्यून चापीय क्षेत्रका कारण देशका विभिन्न क्षेत्रको मौसम प्रभावित हुने जनाएको छ ।

मौसम पूर्वानुमान महाशाखाका अनुसार अहिले प्रदेश १ का पहाडी भूभागमा सामान्य बदली रहेको छ । बाँकी प्रदेशका पहाडी भूभागमा आंशिक बदली रहेको छ । तराईका क्षेत्रमा बाक्लो हुस्सु–कुहिरो लागेको छ ।

त्यस्तै शनिबार दिउँसो प्रदेश १ मा आंशिकदेखि सामान्य बदली रहने छ । प्रदेश २, बागमती र गण्डकी प्रदेशमा आंशिक बदली रहनेछ भने बाँकी प्रदेशमा सामान्यतया सफा रहने देखिन्छ ।
प्रदेश १ का एक–दुई स्थानमा हल्का वर्षाको सम्भावना रहेको मौसमविद्ले बताएका छन् ।

यसैगरि राति प्रदेश १, बागमती प्रदेश, गण्डकी प्रदेश र लुम्बिनी प्रदेशका धेरै भूभागहरू साथै सुदूरपश्चिम प्रदेशका तराईका क्षेत्रमा आंशिकदेखि सामान्य बदली रही देशका बाँकी क्षेत्रमा आंशिक बदली रहनेछ ।

प्रदेश १, बागमती प्रदेश, गण्डकी प्रदेशका एक–दुई स्थानमा हल्का वर्षाको सम्भावना रहेको छ ।

त्यस्तै आइतबार दिउँसो प्रदेश १, गण्डकी प्रदेश, लुम्बिनी प्रदेशका भूभागहरूमा साथै सुदूरपश्चिम प्रदेशका तराईका भूभागहरूमा आंशिकदेखि सामान्य बदली रही देशका बाँकि भूभागमा आंशिक बदली रहनेछ ।

राति देशका पहाडी भूभागमा आंशिक बदली रही देशका बाँकि भूभागमा मौसम सामान्यतया सफा रहनेछ ।

सोमबार दिउँसो भने देशका पहाडी भूभागमा आंशिक बदली रही देशका बाँकि भूभागमा मौसम सामान्यतया सफा रहनेछ ।

राति प्रदेश १ को पहाडी भूभागमा आंशिकदेखि सामान्य बदली साथै अन्य प्रदेशका पहाडी भूभागमा आंशिक रही देशका बाँकि भूभागमा मौसम सामान्यतया सफा रहनेछ । प्रदेश १ का पहाडी भूभागका एक–दुई स्थानमा हल्का वर्षाको सम्भावना रहेको महाशाखाले जनाएको छ ।

यसैबिच देशको विभिन्न भूभागमा तापक्रममा हल्का गिरावट आउनुको साथै तराईका धेरै भूभागहरुमा बिहानको समयमा बाक्लो हुस्सु–कुहिरो समेत लाग्ने सम्भावना रहेकोले चिसोबाट बच्न आवश्यक सतर्कता अपनाउन मौसमविदले आग्रह गरेका छन् ।