बुटवल खानेपानी पाइप लाइनमा आगलागी

बुटवल । रुपन्देहीको तिलोत्तमामा खानेपानी पाइपलाइन तयारीको लागि ल्याइएको पाइपको थुप्रोमा आगलागी भएको छ ।

तिलोत्तमा ४ सीमानगरमा संघीय खानेपानी तथा ढल व्यवस्थापन आयोजना अन्तर्गत निर्माणाधीन शंकरनगर खानेपानी तथा सरसफाइ संस्थाको ओभरहेड टंकी परिसरमा राखिएको पाइपमा शनिबार मध्यान्ह आगलागी भएको प्रहरीले जनाएको छ ।

आगलागीबाट भएको क्षतिको यकीन विवरण आउन बाँकी रहेको राठोरले बताए । स्थानीयका अनुसार आगलागीबाट लाखौं मूल्यको पाइप जलेर नष्ट भएको छ ।

सो आगलागीलाई बुटवल उपमहानगरपालिका, तिलोत्तमा र सिद्धार्थनगर नगरपालिकाका तीनवटा दमकलले आधा घण्टामै नियन्त्रणमा लिएको इलाका प्रहरी कार्यालय बुटवलका प्रमुख प्रतितसिंह राठौरले जनाएका छन् ।

लामो समयदेखि स्टोर गरेर राखिएको पाइपमा कसरी र कसले आगो लगायो भन्ने बारे अनुसन्धान हुने डीएसपी राठौरले बताए ।

घटना शंकास्पद रहेको समेत राठोरले जनाएका छन् ।