४२ औं पर्यटक प्रहरी दिवस सम्पन्न

काठमाडौं । सोमबार नेपाल पर्यटन बोर्ड भृकुटीमण्डपमा ४२ औं पर्यटक प्रहरी दिवस मनाइएको छ । एक समारोहबीच प्रहरी महानिरीक्षक शैलेश थापा क्षेत्रीको प्रमुख आतिथ्यमा पर्यटक प्रहरी दिवस, २०७७ मनाइको हो ।

कार्यक्रममा प्रहरी महानिरीक्षक थापा क्षेत्रीले पर्यटक प्रहरीलाई व्यवसायिक रुपमा सहयोग गर्ने विभिन्न संघ संस्था तथा पर्यटन व्यवसायी तथा उत्कृष्ट प्रहरी अधिकृतहरुलाई सम्मानपत्र प्रदान गरेका थिए ।

उक्त अवसरमा प्रहरी महानिरीक्षक थापा क्षेत्रीले पर्यटकप्रति सबैको समान दृष्टिकोण र सद्य्रीवहार हुनुपर्ने उल्लेख गरे । कतिपय तथ्यलाई आमबुझाइमा बुझिदियो भने त्यो उचित हुन्छ तर त्यही कुरालाई बौद्धिक दृष्टिकोणले हेरिदियो भने कहिलेकाहीँ बुझाइ फरक हुन सक्ने उल्लेख गर्दै उनले भने, ‘सबै पर्यटकलाई अतिथि देव भवः अनुसार व्यवहार गर्नुपर्छ ।’

प्रहरी महानिरीक्षक थापा क्षेत्रीले प्रहरीको मनोबललाई अझ उच्च बनाउनको लागि स्थानीय तहबाट सकारात्मक अपेक्षा तथा सुझावको आवश्यकता रहेको उल्लेख गरे । आगामी दिनमा पर्यटक प्रहरीलाई आवश्यकता अनुसार दक्ष बनाउँदै लैजाने प्रतिवद्धता उनले व्यक्त गरे । नेपाललाई सुरक्षित पर्यटकीय गन्तव्यको रुपमा विकास गर्न पर्यटनसँग आवद्ध सबै सरोकारवाला निकायहरुको भूमिका उत्तिकै महत्वपूर्ण रहेको चर्चा गर्दै पर्यटकीय स्थलहरुलाई कम प्रदूषित बनाउनको निम्ति चालिने कदमप्रति सबैको चासो हुनुपर्नेमा उनले जोड दिए ।

उक्त समारोहमा पर्यटन विभागका महानिर्देशक रुद्रसिंह तामाङले नेपाललाई सुरक्षित पर्यटक गन्तव्यको रुपमा विकास गर्दै लैजानको लागि सबै सरोकारवाला निकायसँग हातेमालो गर्दै अगाडि बढ्नुपर्ने बताए । नेपाल पर्यटन वोर्डका कार्यकारी निर्देशक डा.धनञ्जय रेग्मी, पर्यटनविद् डा. आलोक प्रसाई र टे«किङ एजेन्सीज एसोसिएसन अफ नेपाल (टान) का अध्यक्ष खुम बहादुर सुवेदीले शुभकामना मन्तव्य व्यक्त गर्दै पर्यटक प्रहरीले निर्वाह गरेको भूमिकाबारे चर्चा गरे ।

कार्यक्रममा प्रहरी अतिरिक्त महानिरीक्षकहरु, अध्यागमन विभागका महानिर्देशक, वरिष्ठ प्रहरी अधिकृतहरु लगायत पर्यटन क्षेत्रसँग सम्बन्धित व्यक्तित्वहरुको उपस्थिति रहेको थियो ।