‘बी’ डिभिजन लिगमा श्रीभगवती र श्रीकुमारी विजयी

काठमाडौं । सहिद स्मारक ‘बी’ डिभिजन लिग फुटबल प्रतियोगितामा मङ्गलवार भएका खेलमा श्रीभगवती र श्रीकुमारीले जितेका छन् ।

ललितपुरको सातदोबाटोमा रहेको एन्फा मैदानमा भएको पहिलो खेलमा श्रीभगवती क्लबले ब्वाइज युनियनलाई दुई–एकले हराएको हो । श्रीभगवतीका नवराज गुरुङ र प्रज्ज्वल थापा मगरले एकरएक गोल गरे । ब्वाइज युनियनका टङ्कबहादुर स्याङ्तानले एक गोल फर्काए ।

यो खेल जितेको भगवती ११ खेलमा १५ अङ्क जोड्दै तालिकाको पाँचौँ स्थानमा उक्लिएको छ । ११ खेलमा १७ अङ्क जोडेको ब्याइज युनियन चौथो स्थानमा छ ।

त्यस्तै, एन्फा मैदानमै भएको दोस्रो खेलमा श्रीकुमारी क्लबले टुसाल युथ क्लबलाई चार–शून्यले हराएको छ । श्रीकुमारीका आशिष राईले दुई तथा सन्तोषकुमार सिंह र विवेक पुनले एकरएक गोल गरे ।

११ खेलमा १४ अङ्क जोडेको श्रीकुमारी छैटौँ स्थानमा छ भने नौ अङ्क जोडेको टुसाल दशौँ स्थानमा छ ।