अफगानिस्तानमा भूकम्प, बैंक बन्दको विरोधमा प्रदर्शन

काठमाडौं । तालिवान विद्रोहीहरुले सत्ता कब्जा गरेपछि त्रास फैलिइरहेका बेला अफगनिस्तानमा भूकम्पले अर्को त्रास थपेको छ ।

स्थानीय समयअनुसार शनिबार अफगानिस्तानको दक्षिणपश्चिमी क्षेत्रमा भूकम्प गएको सरकारी अधिकारीहरुले जनाएका छन् । ४ दशमलव ५ म्याग्नीच्युडको भूकम्पका कारण आमनागरिकमा त्रास फैलिएको छ ।

भूकम्पले पारेको क्षतिका बारेमा थप विवरण आउन बाँकी रहेको र भूकम्प प्रभावित क्षेत्रमा खोजी तथा उद्धार कार्य जारी रहेको बताइएको छ ।

अमेरिकाद्वारा एक दिनमा ६८ सयको उद्धार
अफगानिस्तान छाडेर बाहिरिन चाहेका व्यक्तिहरुलाई उद्धार गर्ने क्रममा अमेरिकाले थप छ हजार ८०० लाई उद्धार गरेको छ ।

तालिवान विद्रोहीहरुले सत्ता कब्जा गरेपछि त्रासका कारण लाखौँ मानिसले अफगानिस्तान छोड्न चाहिरहेको अधिकारीहरुले जनाएका छन् ।

तीमध्ये हजारौँ व्यक्तिलाई अमेरिकी र अन्य विभिन्न देशका विमानले उद्धार गरेर विभिन्न देशमा लगिदिने गरेका छन् । यही अगस्ट १४ देखि अहिलेसम्म दैनिक हजारौँ मानिस अफगानिस्तान छाडेर अन्य देश गएका छन् । पछिल्लो २४ घण्टामा अमेरिका विमानबाट मात्रै झण्डै छ हजार ८०० मानिस बाहिरिएको अधिकारीहरुले जनाएका छन् ।

योसँगै अफगानिस्तानबाट अमेरिकाले अहिलेसम्म उद्धार गरेकाहरुको सङ्ख्या एक लाख ११ हजार ९०० पुगेको छ । अफगानिस्तानको केन्द्रीय राजधानी काबुलस्थीत अन्तर्राष्ट्रिय विमानस्थलबाट उनीहरुलाई उद्धार गरिएको हो ।

अफगानिस्तान छोड्न चाहनेको भीड विमानस्थलमा निरन्तर लागेपछि उनीहरुलाई रोक्न बिहीबार विमानस्थल नजिकै बम विस्फोटन गराइएको थियो ।

विस्फोटनमा परी १०० भन्दा बढीको मृत्यु भएको छ । तर पनि त्यहाँ जम्मा हुने क्रम र उद्धार गर्ने क्रम चलिरहेको अधिकारीहरुले जनाएका छन् ।

बैंक बन्दको विरुद्धमा प्रदर्शन
राजनीतिक अवस्था परिवर्तनसँगै अफगानिस्तानको केन्द्रीय राजधानी काबुलमा रहेका बैंकहरु बन्द गरिएकोप्रति आपत्ति जनाउदै विरोध प्रदर्शन भएको छ । बैंकहरु बन्द हुदाँ आर्थिक कारोबार गर्न नपाएर आम उपभोक्ता मर्कामा परेको भन्दै शनिबार काबुलमा विरोध प्रदर्शन भएको हो ।

प्रदर्शनमा सहभागी हजारौँ प्रदर्शनकारीले बैंकबाट प्रदान गरिने सेवा तत्काल सुरु गर्न माग गरेका छन् । प्रदर्शनमा महिलाहरुको पनि उल्लेख्य सहभागिता रहेको बताइएको छ ।