मध्यपूर्वका प्रतिनिधिसँग एनआरएनए उम्मेद्‌वारले अन्तर्क्रिया गर्ने

काठमाडौं । गैरआवासीय नेपाली संघको आगामी निर्वाचनमा अध्यक्षका प्रत्यासी डा. बद्री केसीले मध्यपूर्व क्षेत्रका महाधिवेशन प्रतिनिधिहरुसँग अन्तरक्रिया गर्ने भएका छन् ।

गैरआवासीय नेपाली संघको महिला उपाध्यक्षकी प्रत्यासी यसमिन बेगम सैयदका अनुसार केसीले आफ्नो एजेण्डासँग सहमत केही उम्मेद्वार सहित आगामी शुक्रवार (१ अक्टोवर) का दिन ती प्रतिनिधिहससँग छलफल गर्न लागेका हुन् ।

नेपाली समय साँझ ६ बजे देखि सुरु हुने कार्यक्रममा प्रतिनिधिहरु, राष्ट्रिय समितिका अध्यक्षहरुसँग अन्तरक्रिया तथा सुझाव संकलन गर्ने तयारी गरिएको छ ।

कार्यक्रमलाई उपाध्यक्षका उम्मेदवारहरु डा. हेम राज शर्मा, महेश श्रेष्ठ, डिबी क्षेत्री, धर्मराज अधिकारी, यासमिन बेगम सैयद, महासचिव पदका उम्मेदवार गौरीराज जोशी, कोषाध्यक्ष पदका उम्मेदवार लोक प्रसाद दाहाल, सचिव पदकी उम्मेदवार टिक गुरुङ लगायतले सम्वोधन गर्ने कार्यक्रम तय गरिएको छ ।

मध्यपूर्वमा संघका ६ वटा राष्ट्रिय समिति सक्रिय रहेका छन् । यसअघि डा. केसीले मंगलवार एशिया क्षेत्रीय प्रतिनिधिहरुसंग छलफल गरेका थिए ।

करिब तीन सय ५० जना सहभागी कार्यक्रममा विभिन्न देशका राष्ट्रिय समितिका अध्यक्ष तथा प्रतिनिधिहरुले शुभकामना मन्तव्य दिएका थिए ।

कार्यक्रममा संघको नेतृत्वको लागि बिभिन्न पदमा रहेका उम्मेदवारहरुले आआफ्नो एजेण्डा प्रस्तुत गरेका थिए । यसैबीच अध्यक्षका प्रत्यासी डा. बद्री केसीको सचिवालयले दिएको जानकारी अनुसार केसीले आगामी हप्ता देखि बिभिन्न देशमा रहेका प्रतिनिधिसँग प्रत्यक्ष अन्तरक्रिया गर्ने छन् ।

गैरआवासीय नेपाली संघको १० औं महाधिवेशन अक्टोवर २३ देखी २५ सम्म काठमाडौंमा हुदैँ छ ।