‘हाम्रा अन्नदाताहरुलाई परेको पीडामा सक्दो सहयोग गरौं’

काठमाडौं । बेमौसमी वर्षाका कारण किसानहरुमा परेको पीडा र मारमा सबै नेपालीले सक्दो सहयोग गर्न प्रदेश २ का निवर्तमान प्रदेश प्रमुख राजेश अहिराजले आग्रह गरेका छन् ।

बेमौसमी भारी वर्षाका कारण अर्बौंको धानबाली नष्ट भएको छ भने ८८ जनाको ज्यान गएको र कैयौं बेपत्ता भएका छन् । यस्तो पीडाको घडीमा सबै नेपालीले सहयोग र सद्भाव देखाउनुपर्ने उनले बताएका छन् । यसबाट सबभन्दा बढी मारमा किसानहरु परेकाले नेपालीहरुले सहयोग गर्नुपर्ने धारणा राखेका हुन् ।

अहिराजले प्रभावित क्षेत्रहरुमा अनुगमन गर्दै एक भिडियो सन्देश जारी गरेका छन् । उनले भनेका छन्, ‘यी पीडामा म थुप्रै किसानहरुसँग भेटें, खेतबालीमा गएँ, उहाँहरुको आँखाभरि आँशु छन् । किसानहरुको परिवारमा एक खालको पीडा, भविष्यको चिन्ता, भोलि के खाने, लालाबालालाई कसरी पाल्ने, जीवन कसरी धान्ने भन्ने पीडामा छन् ।’

किसानहरुको पीडाबारे बोल्दै उनले थप भनेका छन्, ‘अहिले किसानको पीडा सुनिदिने वा बोलिदिने कोही भएन । हामी सबै नेपालीहरु जहाँ र जसरी भएपनि किसानहरुका लागि मुठ्ठीदान गरौं । तपाईं हाम्रो सहयोग र साथले किसानका अनुहारमा खुसी आउँछन् ।’

उनले हाम्रा अन्नदाताको आँशु पुछ्न, अनुहारमा खुसी ल्याउन र खानको व्यवस्था गरिदिन नेपालीहरु सक्षम रहेको बताउँदै सबै चाह्यो भने यो असम्भव नरहेको जिकिर गरेका छन् । ‘म सबै नेपालीलाई हात जोडेर बिन्ती गर्न चाहन्छु कि किसानहरुलाई परेको यो पीडा र दुःखमा हामी साथ दिऔं,’ उनले भनेका छन् ।

उनले हाम्रा अन्नदाताहरु मारमा पर्दा कोही पनि मौन बस्न नहुने धारणा राखेका छन् । ‘हामी तपाईंसँग छौं भन्ने किसानलाई हौसला दिनका लागि अब घरबाट पाइला बाहिर निकाल्नुपर्ने आवश्यकता छ,’ उनले भनेका छन् ।