खस क्षेत्री महासंघलाई कांग्रेसले मान्यता नदिएकोमा गुनासो

काठमाडौं । नेपाली कांग्रेसको विधानअनुसार आदिवासी खस क्षेत्री महासंघलाई पार्टीको शुभेच्छुक संस्थाका रुपमा दर्ता नगरिएकामा खस क्षेत्री समुदायले गुनासो गरेको छ ।

पार्टीको संघ संस्था समन्वय विभाग प्रमुख नारायणप्रकाश सावदले विधान बनाएर पेस गर्नु भनेअनुसार गत भदौमै सबै प्रक्रिया पूरा गर्दा पनि महासंघलाई मान्यता नदिएको अध्यक्ष विष्णु खड्काले गुनासो गरे । विभाग प्रमुख सावद, महामन्त्री पूर्णबहादुर खड्काले केन्द्रीय समिति बैठकमा शुभेच्छुक संस्थाको मान्यताको प्रस्ताव पेस नगरी खस क्षेत्री समुदायलाई उपेक्षा गरेको भन्दै आज विज्ञप्ति निकालेर महासंघले विरोध जनाएको हो ।

नेपालको इतिहासमा आदिवासी खस क्षेत्री समुदाय राष्ट्रियता, प्रजातन्त्र र समाजवादमा आस्था र निष्ठावान भई पार्टीमा निरन्तर क्रियाशील रहेकामाथि पटकपटक प्रहार गर्ने कार्य निरन्तर हुँदै आएको विज्ञप्तिमा उल्लेख छ । आदिवासी खस समुदायको एकता एवं पुर्खाको इतिहासलाई अक्षुण्ण राख्नका लागि मुलुक भरी बसोबास गर्ने बहुसङ्ख्यक खस समुदायको साझा संस्थालाई मान्यता नदिने पार्टीको निर्णयप्रति महासंघले दुःख प्रकट गरेको हो ।

शुभेच्छुक संस्थाको रुपमा आवद्ध हुन सम्बन्धित समितिबाट आवद्धता मागिएकाले विधान दर्ता गत भदौ ९ गते दर्ता नं २९ मा पार्टी कार्यालयमा गरिएको महासंघको विज्ञप्तिमा उल्लेख छ ।

महासंघले यो विषयलाई १४औँ महाधिवेशनमा गम्भीरताका साथ उठाउन पनि खस क्षेत्री समुदायका महाधिवेशन प्रतिनिधिमा आह्वान गरेको छ । साथै नयाँ निर्वाचित हुने पार्टी केन्द्रीय समितिसमक्ष महासंघलाई शुभेच्छुक संस्थाका रुपमा आवद्धता दिन पुनःजोडदार माग गरेको छ ।