कांग्रेस धनुषामा जिल्ला अधिवेशन हुँदै, यादव संस्थापन सभापतिका उम्मेद्‌वार

काठमाडौं । नेपाली कांग्रेस संस्थापन पक्षले धनुषा जिल्ला सभापतिको उम्मेदवारमा सन्तोष यादवलाई अघि सारेको छ । नेपाली कांग्रेस धनुषामा जिल्ला अधिवेशन हुँदैछ । सोही अधिवेशनका लागि पार्टी सभापति शेरबहादुर देउवा पक्षधर नेताहरुको भेलाबाट यादवलाई सभापतिमा उम्मेदवार बनाउने निर्णय गरिएको केन्द्रिय सदस्य रमेश रिजालले जानकारी दिए ।

उनले पार्टीलाई आउने निर्वाचनमा बलियो बनाउनुपर्ने आवश्यकता रहेको बताउँदै यसको लागि युवा र काम गर्ने व्यक्तिको आवश्यकता रहेकाले यादवलाई सभापतिको उम्मेदवार बनाउने निर्णय गर्नु परेको पनि बताए । यादव सबैभन्दा योग्य व्यक्ति रहेको कारणले सबैसँग छलफल गरेर उम्मेदवार बनाउने निर्णय लिएको नेता रिजालको भनाई छ ।

भेलामा बोल्दै काग्रेस नेता आनन्द ढुंगानाले अहिलेपनि लोकतन्त्रलाई संस्थागत गर्नुपर्ने दायित्व नेपाली काग्रेसको काँधमा रहेको बताए । उनले नेपाली काँग्रेसको नेतृत्वमा संविधानको सफल कार्यान्वयन र निर्वाचन आवश्यक रहेको बताए । ढुंगानाले संविधानलाई बलियो बनाउनुको साथसाथै संघीयताको संस्थागत विकासमा समेत काँग्रेसको काँधमा दायित्व आएको बताए ।

त्यसैगरि कांग्रेसका सहमहामन्त्री महेन्द्र यादवले पार्टी विधि र प्रक्रिया अनुसार चल्नुपर्ने आवश्यकता रहेको औल्याउँदै अहिले लोकतन्त्रको पर्यायवाची नै आफनो पार्टी भएको जिकिर गरे । उनले अहिले पार्टीलाई गुटगत भन्दापनि सबैको मन जित्ने खालको नेतृत्वको आवश्यकता रहेको औंल्याए । यादवले युवाको काँधमा जिम्मेवारी आउँदा आउने निर्वाचनमा जिताउने समेत बताए ।

कांग्रेस प्रदेश नम्बर २ का अध्यक्ष कृष्ण यादवले तीन वटै तहको निर्वाचनमा पार्टीलाई कसरी बलियो बनाउने त्यो दायित्व रहेको बताएका थिए भने सभापतिका उम्मेदवार सन्तोष यादवले आफू विजयी भए पार्टीलाई एकतावद्ध बनाएर लैजाने प्रतिवद्धता व्यक्त गरे ।

यादवले विगतमा पार्टी आफ्नै कमजोरीको कारणले तिन तहको निर्वाचनमा पराजित भएको बताउदै संगठनलाई बलियो बनाउने एक मात्र आफनो अभियान रहनेसमेत बताए । यता, नेता विमलेन्द्र नीधि पक्षबाट योगेन्द्र पंजियारले सभापतिमा उम्मेदवारी घोषणा गरिसकेका छन् ।