शुक्रबार, जेठ ११, २०८१

केपी ओलीले आफ्नो घर कसरी सम्हाल्ने भनेर चिन्ता गर्नुपर्‍यो : विश्वप्रकाश शर्मा

नेपालखोज २०७८ चैत ७ गते १६:०७

काठमाडाैं । नेपाली कांग्रेसका महामन्त्री विश्वप्रकाश शर्माले देशलाई सही दिशामा लैजान कांग्रेस कटिबद्ध रहेको बताएका छन् । चितवनमा पत्रकारहरुसँग कुराकानी गर्दै उनले कांग्रेस र सरकारको ध्यान अहिले निर्वाचनमार्फत देशलाई सही दिशामा लैजान केन्द्रित भएको बताए ।

महामन्त्री शर्माले सरकारले अहिले जनताको जीवन रक्षाको कामसँगै सदनबाट हुने कामलाई पनि अघि बढाइरहेको बताए । जनादेश लिएको नेकपा एमालेले सरकार चलाउन पनि नसकेको र संसद् पनि चल्न नदिने गरेको उनले आरोप लगाए । जनादेशको अपमान गर्दै एमालेले संसद् भंग गरेको उनले बताए । उनले भने, ‘सरकार पनि चलाउन नसक्ने संसद् पनि चल्न नदिने भनेपछि जनताको जनादेशको अपमान कसले गरेको छ ।

उनले केन्द्रीय समितिको बैठकले मात्रै निर्वाचनमा तालमेल हुने/नहुने निर्णय गर्ने बताए । उनले भने, ‘निर्वाचनमा कसरी अगाडि बढ्ने भन्ने विषयमा केन्द्रीय समितिको बैठक बोलाइएको छ । बैठकले निर्णय गर्छ ।’

महामन्त्री शर्माले स्थानीय तहको राय सल्लाहबिना केन्द्रले निर्णय नगर्ने बताउँदै विगतमा भएका कमजोरी र राम्रा कामको समीक्षा गर्दै अघि बढ्ने बताए । उनले नेकपा एमालेका अध्यक्ष केपी ओलीलाई उत्तेजनात्मक अभिव्यक्ति दिन भन्दा बिग्रिएको, भत्किएको घर मिलाउन सुझाब दिए । उनले भने, ‘पहिला उहाँले आफ्नो घर सम्हाल्ने कसरी भनेर चिन्ता गर्नुपर्छ ।’

अघिल्लो पटकको निर्वाचनमा काँग्रेस एक्लै निर्वाचन लड्दा सबै कम्युनिस्ट एक भएको स्मरण गर्दै उनले भने ‘पहिला उहाँसँग भएका प्रचण्ड, माधव नेपाल, झलनाथ बामदेव कहाँ छन् । वास्तविक धरातल यही हो ।’

आगामी निर्वाचनमा कांग्रेस देशको ठूलो र बहुमतको पार्टी बन्ने उनले दाबी गरे । ‍

प्रतिक्रिया