संघीयता सफल बनाउन सबै तहका सरकार मिलेर अघि बढ्नुपर्छ : मन्त्री झाँक्री

काठमाडौं । सहरी विकास मन्त्री रामकुमारी झाँक्रीले संघीयता सफल बनाउन सबै तहका सरकार मिलेर अघि बढ्नुपर्ने बताएकी छन् । उनले संघीय सरकार, प्रदेश सरकार र स्थानीय तहको कार्य क्षेत्रबारे विवाद आवश्यक नरहेको बताउँदै संघीयता सफल बनाउन सबै तहका सरकार मिलेर अघि बढाउनुपर्ने बताएकी हुन् ।

सहरी विकास मन्त्रालयद्वारा प्रदेश नम्बर १ को विराटनगरमा आज आयोजित राष्ट्रिय सहरी निति तथा सहरी विकास ऐन तर्जुमा सम्बन्धी प्रदेशस्तरीय छलफल तथा अन्तरक्रिया कार्यक्रममा बोल्दै मन्त्री झाँक्रीले संघीयताको मर्मअनुसार सबै मिलेर अघि बढ्नुपर्ने बताइन् ।

उनले भनिन्, ‘अब हामीले तीनै तहका सरकारका कार्य क्षेत्रबारे विवाद गरेर बस्नु हुँदैन । सँगै मिलेर अघि बढ्नुपर्छ ।’ मन्त्री झाँक्रीले अब केन्द्रले बजेट तथा कार्यक्रम बनाउन नहुने बताउँदै अब योजना छनोट वडा तहबाट हुनुपर्ने बताईन् । मन्त्रालयले संघीयता अनुसारको शहरी नीति परिमार्जन र शहरी विकास ऐन बनाउने बताउँदै यसमा सबैको अपनत्व हुने बताईन् ।
प्रदेश नम्बर १ का मुख्यमन्त्री राजेन्द्रप्रसाद राईले संघीयताको मर्मअनुसार विकास र बजेट विकेन्द्रीत हुनुपर्ने बताए । ठूला शहरमा मात्र विकास र लगानी केन्द्रीत हुँदा बसाई सराईको क्रम बढेको बताउँदै उनले सबै क्षेत्रमा विकास पुग्ने गरी नीति परिमार्जन गर्नुपर्ने बताए ।

उनले भने, ‘विकास निर्माणका काम ठूला सहरमा मात्र केन्द्रीत हुँदा बसाई सराई बढेको छ । अब विकास र बजेट अविकसित ठाउँमा पुर्याउनुपर्छ । यी विषयहरु शहरी नीति परिमार्जन र शहरी विकास ऐन बन्नुपर्छ ।’ शहरी विकास मन्त्रालयका सचिव डा. रमेशप्रसाद सिंहले संघीयतापछि शहरी नीति परिमार्जन आवश्यकता देखिएकोे बताए । विभिन्न सुख सविधा खोज्दै सहरमा बसाइ सर्नेदर बढिरहेको बताउँदै उनले परिमार्जित सहरी नीति र सहरी विकास ऐनले यसलाई समेट्ने बताए ।

सचिव डा. सिंहले सहरी विकास नीति परिमार्जन र सहरी विकास ऐन नहुँदा तीनै तहका सरकारबीचको समन्वयमा समस्या सिर्जना भएकोे बताए । सहरी नीति परिमार्जन नहुँदा तीनै तहका सरकारबीच समन्वयमा समस्या भएको र प्राकृतिक स्रोत साधन बाँडफाटमा समेत अन्यौलता रहेको छ । सहरी विकास भवन निर्माण विभागका उपमहानिर्देशक दिलिप भण्डारीले मन्त्रालयले सातै प्रदेशमा सबैको रायसहित सहरी नीति परिमार्जन गरिने र सहरी नीति र सहरी विकास ऐनमा सबैको अपनत्व हुने बताए ।

मन्त्रालयका सिनियर डिभिजनल इन्जिनियर रोशन श्रेष्ठले सहरी विकास नीति परिमार्जनबाट स्पष्ट मार्ग निर्देशन गर्ने बताए । सहरी विकास ऐनको मस्यौदा अन्तिम चरणमा पुगेको बताउँदै श्रेष्ठले युटिलिटी कोरिडोर निर्माणले सहर व्यवस्थित बनाउन महत्वपूर्ण हुने बताए । अर्जुनधारा नगपालिकाका मेयर हरि रानाले सहरी नीति परिमार्जन तथा सहरी विकास ऐनले हाल देखिएका समस्या समाधान हुने बताए ।