शुक्रबार, चैत १६, २०८०

कञ्चनपुरको गणेशपुर ५५ वर्षपछि सडक सन्जालमा जोडियो

नेपालखोज २०७९ जेठ २६ गते १६:३९

कञ्चनपुर । शुक्लाफाँटा नगरपाालिका १, गणेशपुरका शेरसिंह राना निकै खुसी देखिन्छन् । घर जोड्ने सडक निर्माण भएपछि उनी खुसी भएका हुन् । बसोबास भएको ५५ वर्षपछि राना परिवार सडक सन्जालमा जोडिएका हुन् ।

‘घर वरिपरि खेत थियो, त्यसमै पुर्ख्यौली घर थियो,’ उनले भने, ‘घर आउजाउ गर्न सडक त परको कुरा हिँडडुल गर्ने बाटो नै थिएन । खेतको आली भएर हिँडडुल गर्नु पर्दथ्यो ।’ खेतको आली भएर घरपालुवा जनावर र परिवारका सदस्यले हिँड्ने गरेको उनले बताए ।

‘अर्काको खेत भएर जनावरलाई डोर्‍याएर लैजाँदै गर्दा कहिले खेतमा नोक्सानी गरिहाल्थे,’ उनले भने, ‘छिमेकीको गालीमात्रै होइन । कहिलेकाहीँ खप्कीसमेत खानुपर्थ्यो । अब ती कुरा विगत भइसके । हिँड्ने खेतका आली सडकमा परिणत भएका छन् । सहज रूपमा हिँडडुल गर्न पाइएको छ ।’

खेतसम्मै ट्र्याक्टर गुडाएर जोत्न सकिने भएको उनले बताए । रानासँग तीन बिघा बढी जग्गा छ । सडक निर्माण नहुँदा जग्गाको मूल्य थोरै थियो । सडक निर्माणले जग्गाको मूल्यसमेत दोब्बरले बढेको उनी बताउँछन् । शेरसिंहसँगै १२ परिवार किसान सडकमा जोडिएका छन् ।

किसान बाबुरा रानाले सडक निर्माणपछि निर्धक्कसँग खेतीपाती गर्न र हिँडडुल गर्न पाइएको बताए । ‘विगतका जनप्रतिनिधिसँग सडक खोलिदिनका लागि हारगुहार गरे पनि पाँच वर्षसम्म सुनुवाइ हुन सकेन,’ उनले भने, ‘नवनिर्वाचित वडाध्यक्षले निर्वाचित भएर आएपछि वडाको पहिलो काम सडकबाट बञ्चितका लागि सडक खोलेर गुन लगाएका छन् ।’

२०२४ सालदेखि बस्दै आएका बासिन्दा सडकको अभाव झैल्दै आएका थिए । वडाकै पुरानो बस्ती अब सडक सन्जालमा जोडिएपछि स्थानीय बासिन्दा निकै खुसी छन् । जनताको पीरमर्का बुझ्ने जनप्रतिनिधि पाउँदा सहज भएको स्थानीय बासिन्दा बताउन पछि पर्दैनन् । वडाध्यक्ष उत्तरदेव भट्ट स्थानीय बासिन्दाकै सहकार्य र सहमतिमा सडकको अभाव झेल्दै आएका बासिन्दालाई सुविधा पुर्‍याउन सडक खोलेको बताउँछन् ।

‘सडक एकातर्फ मात्रै सडक सन्जालमा जोडिएको छ,’ उनले भने, ‘अर्कोतर्फ सडक सन्जालमा जोड्नका लागि स्थानि बासिन्दासँग छलफल सुरु गरेका छौँ, छिटै निष्कर्षमा पुग्छौँ ।’हाल एक दशमलव पाँच किलोमिटर सडक वडाको पहलमा निर्माण गरिएको उनले बताए । भर्खरै खोलिएको सडकको स्तरोन्नति गरी छिट्टै ग्राभेल राख्ने कार्यसमेत गरिने उनको भनाइ छ । -रासस

क्याप्सन : शुक्लाफाँटा नगरपालिका १०, झलारी बजारमा सडक फाराकिलो पार्न घर भत्काउँदै गरेका मजदुर । एसियाली विकास बैंकको सहुलियत ऋण सहयोगमा आधुनिक सडक निर्माणको भइरहेको छ ।

प्रतिक्रिया