भाटभटेनी सुपरमार्केटलाई माछापुच्छ्रेले दियो नेपाल पे क्युआरकोड

काठमाडौं । माछापुच्छ्रे बैंकले भाटभटेनी सुपरमार्केट तथा डिपार्टमेन्टल स्टोरलाई एनसीएचएलद्वारा प्रवर्द्धित नेपाल पे क्युआर कोड हस्तान्तरण गरेको छ ।

नगदरहित कारोबारलाई प्रवर्द्धन गर्ने तथा ग्राहक एवं व्यापारीलाई सहज डिजिटल बैंकिङ सेवाको पहुँच पुर्याउने लक्ष्यका साथ क्युआर सेवा भाटभटेनी सुपरमार्केटका अध्यक्ष मीनबहादुर गुरुङलाई एक औपचारिक कार्यक्रममा माछापुच्छ्रे बैंकका प्रमुख कार्यकारी अधिकृत सन्तोष कोइरालाले प्रदान गरे ।

कार्यक्रममा बैंकका नायब प्रमुख कार्यकारी अधिकृत सर्जुकुमार थापा, नायब महाप्रबन्धक प्रसिद्धराज अर्याललगायतको उपस्थिति थियो । नेपाल पेको क्युआर सेवा सुरु भएसँगै ग्राहकले आफूले उपभोग गरेको वस्तु तथा सेवाको रकम भुक्तानी सीधै आफ्नो बैंक खाताबाट एम स्मार्ट (मोबाइल बैंकिङ एप्लिकेसन अफ एमबीएल) मार्फत भुक्तानी गर्न सक्नेछन् ।

आफूले प्रयोग गरेको वस्तु तथा सेवाको आफ्नै बैंक खातामार्फत डिजिटल भुक्तानी गर्दा ग्राहकका साथै व्यापारीलाई समेत खुद्रा पैसाको झन्झट नहुने, बचत गर्ने बानीको विकास हुने, व्यापारीलाई हरेक दिन आफूले गरेको व्यापारबाट आएको पैसा जम्मा गर्न बैंकसम्म जानुनपर्नेलगायत थुपै सुविधाका कारणले क्युआर कोड सेवाको पछिल्लो समय सबै वर्ग र क्षेत्रमा आकर्षण बढ्दै गएको छ ।

माछापुच्छ्रेले पछिल्लो समय देशका धेरैजसो स्थानमा आक्रमक रुपमा यो सेवा प्रदान गर्दै आइरहेको छ । स्थापनाकालदेखि नै नयाँ-नयाँ प्रविधिमा आधारित सेवा ग्राहकमाझ ल्याउन कटिबद्ध माछापुच्छ्रेले हालै मात्र नेपाली कमर्सियल बैंकिङ इतिहासमा पहिलोपटक आफ्नै मोबाइल वालेट रेमिट्याप सञ्चालनमा ल्याएको छ । अन्य डिजिटल सेवामा जस्तै- मोबाइल बैंकिङ सेवा, इन्टरनेट बैंकिङ सेवा, अनलाइनमार्फत खाता एवं मुद्दती खाता खोल्नेलगायत थुप्रै अत्याधुनिक प्रविधि ग्राहकमाझ ल्याइसकेको छ ।