शनिबार, असोज १५, २०७९

तानसेनको टुँडिखेल स्तरोन्नति अन्तिम चरणमा

नेपालखोज २०७९ भदौ ३ गते १५:३१

पाल्पा । तानसेन नगरपालिकाको टुँडिखेल मैदान स्तरोन्नतिको कार्य अन्तिम चरणमा पुगेको छ । नगरपालिका कार्यालय प्रांगणमा रहेको टुँडिखेल मैदानको हालसम्म ८५ प्रतिशत काम पूरा भएको छ ।

नगरपालिकाले आर्थिक वर्ष ०७६/७७ मा टुँडिखेल मैदान सुधारका लागि जय नेपाल ईश्वरचन्द्र निर्माण सेवा प्रालिले दुई वर्षभित्र काम सक्ने गरी तीन करोड ८२ लाख ९४ हजार रुपैयाँबराबरको बोलपत्र आह्वान भएकामा ठेक्का सम्झौता गरी निर्माणको जिम्मेवारी लिएको हो। टुँडिखेलको खुला क्षेत्रलाई सुधार गरेर आकर्षक बनाउने योजनाअनुसार काम अन्तिम चरणमा पुगेको तानसेन नगरपालिकाका प्रमुख सन्तोषलाल श्रेष्ठले बताए । ढिलासुस्ती भइरहेको कामलाई निरन्तर निगरानी तथा खबरदारी गरेसँगै टुँडिखेलमा मर्निङवाक स्थल, फुटबल खेलमैदान र विश्रामस्थल बनिसकेको नगरप्रमुख श्रेष्ठको भनाइ छ ।

उनी भन्छन्, ‘दुई वर्षअगाडि नै सक्नुपर्ने काममा निरन्तर ताकेता गरेपछि अहिले दुबोरोपण कार्य सकिने क्रममा छ, यसले तानसेनको थप सौन्दर्य थप्नेछ ।’ विगतमा नेपाली सेनाको सहयोग र पाल्पा उद्योग वाणिज्य संघ समन्वयमा टुँडिखेलमा घाँस रोपिएको थियो । अहिले यहाँ ७४ मिटर चौडाइ र एक सय नौ मिटर लम्बाइमा बर्मुडा दुबो रोपिएको छ ।

मैदानभित्र रोपिएको दुबो दुई महिनामा हरियो हुन्छ । त्यसलाई दुईपटक घाँस काटेपछि दुबो रोपेको कम्पनी तिलोत्तमा एग्रिकल्चर फार्मले निर्माण व्यवसायीलाई हस्तान्तण गर्नेछ । कम्तीमा आठपटक दुबोलाई मेसिनले काटेपछि टुँडिखेलमा खेल खेल्नका लागि तयार हुने बताइएको छ ।

आगामी फागुनदेखि खेलमैदान स्तरोन्नति भई पूर्ण रूपमा तयार हुने तानसेन नगरपालिका प्रवक्ता यादवसिंह कार्कीले जानकारी दिए । २०५० सालअघि यहाँ हुने गरेका राष्ट्रियस्तरका फुटबल प्रतियोगिता वीरेन्द्र सिल्ड, राष्ट्रियस्तरको भलिबल, इन्डो-नेपाल क्रिकेट, कराते प्रतियोगितालगायत पुनः सञ्चालन गरिनेछ । यहाँको टुँडिखेल मैदान स्तरोन्नति कार्यले खेलप्रेमीमा उत्साह जागेको छ ।

पाल्पा सदरमुकाम तानसेन भित्रने नाकामै रहेको यस मैदानमा ठूला-ठूला कार्यक्रम, सभा-समारोह हुने गरेका छन् । खेलमैदानको छेउमा रहेको पाल्पाली करुवाका कारण पनि यहाँ जानेको आकर्षण उत्तिकै छ । यहाँ रहेको करुवा अवलोकन गर्दै टुँडिखेल विश्राम गरेर बस्ने थलोका रूपमा पनि लिइन्छ । -रासस

प्रतिक्रिया