पाल्पामा बस दुर्घटना हुँदा ६ जनाको मृत्यु

काठमाण्डौं । पाल्पाको रैनादेवी छहरा गाउँपालिका–८, खुर्सानेमा गए राति यात्रुवाहक बस दुर्घटना हुँदा कम्तीमा ६ जनाको मृत्यू भएको छ ।

रूपन्देहीको सालझण्डीबाट यात्रु लिएर पाल्पाको रैनादेवी छहराको खुर्साने गइरहेको ग १ ख ४९७७ नम्बरको बस दुर्घटनामा पर्दा अन्य १५ यात्रु घाइते भएका छन् । घाइतेको उद्धार गरी लुम्बिनी प्रादेशिक अस्पताल बुटवल पठाइएको छ ।

खुर्साने पुग्नै लाग्दा लाग्दा बुढीदमार भन्ने स्थानमा दुर्घटना भएको वडाध्यक्ष रेमबहादुर रानाले जानकारी दिए । बस सडकबाट ५० मिटर तल भिरमा खसेको उनको भनाई छ ।

मृत्यू हुनेमा खुसार्ने गाउँका खेमकुमारी राना, निर्मला घिमिरे, सुरुमा घिमिरे, कमला खत्री र गुनी गाहा हुन् । वडा अध्यक्ष रानाका अनुसार एक मृतकको पहिचान हुन सकेको छैन् ।

घटनास्थलमा रहेका जिल्ला प्रहरी कार्यालय पाल्पाका प्रहरी निरीक्षक श्रीराम भट्टले दुर्घटनामा परी ६ जनाको घटनास्थलमै मृत्यु भएको पुष्टि गरे । मृतक सबै महिला रहेको बुझिएको छ । उनीहरूको पहिचान भने खुलेको छैन।

राति १० बजेको समयमा भएको दुर्घटनाबारे बसमा सवार यात्रुले नै फोन गरि सूचना दिएको प्रहरीले जनाएको छ ।