प्रदेश १ मा सभामुख चयनको तालिका सार्वजनिक

काठमाण्डौं । प्रदेश १ प्रदेशसभाको सभामुख चयनको कार्यतालिका सार्वजनिक भएको छ । कार्यतालिकाअनुसार आज ३ बजेदेखि ५ बजे सम्म सभामुखका उम्मेदवारको मनोनयन दर्ता हुनेछ । ५ बजे मनोनयन दर्ता भएका उमेद्वारको नामावाली टाँस गरिनेछ ।

उम्मेदवार उपरको दाबी विरोध गर्ने, त्यसमाथिको छानबिन र अन्तिम नामावाली प्रकाशन गर्ने कार्यतालिका रहेको छ । सभामुखको निर्वाचन भने २८ गते गर्ने कार्यतालिका रहेको संसद सचिवालयका सचिव गोपाल पराजुलीले बताए ।

यसैबीच, सत्ता गठबन्धनका तर्फबाट बाबुराम गौतमलाई प्रदेश १ को सभामुखको रूपमा अघि सार्ने निर्णय गरेको छ । उनी माओवादीका तर्फबाट ओखलढुंगाबाट निर्वाचित प्रदेशसभा सदस्य हुन् ।

सत्ता साझेदार दलहरूका बीचमा पद बाँडफाँट गर्दा प्रदेश १ को सभामुख माओवादीको भागमा परेको छ । उप सभामुख भने एमाललेले पाएको छ ।