नाइजेरियाली सेनाको कारबाहीमा कम्तीमा ४० जना बन्दुकधारीको मृत्यु

अबुजा । नाइजेरियाली सेनाले पछिल्लो दुई सातामा गरेको कारबाहीमा ४० जना बन्दुकधारी मारिएको एक सैनिक प्रवक्ताले बिहीबार बताएका छन् ।

‘देशको उत्तरपूर्वी भागमा बोको हराम र इस्लामिक स्टेट पश्चिम अफ्रिका प्रान्तसमूहका कम्तीमा १८ सदस्य मारिएका छन् भने ५० भन्दा बढी लडाकू पक्राउ परेका छन्,’ प्रवक्ता मुसा दानमदामीले भने ।

उत्तर–मध्य क्षेत्रमा आठ जना डाकु मारिएको र अपहरणमा परेका पाँच जनालाई सेनाले मुक्त गरेको र करिब २८ जना डाँकुलाई पक्राउ गरिएको दानमादामीले पुष्टि गरे । देशको उत्तरपश्चिमी भागमा सरकारी सेनाले अपराधीहरुको घेरा सफा गर्ने क्रममा कम्तीमा १४ जना डाँकुहरुको हत्या गरेको र १६ जना अपहृत नागरिकहरूको उद्धार गरेको उनले बताए ।

सेनाको अभियानलाई ‘प्रशंसनीय र सफल’ भन्दै दानमादामीले १५४ वयस्क पुरुष, ५१४ वयस्क महिला र ८३८ बालबालिका गरी कुल एक हजार ५०६ आतङ्ककारी र उनीहरूका परिवारका सदस्यहरुले विभिन्न स्थानमा सरकारी सेनासमक्ष आत्मसमर्पण गरेको बताए ।

नाइजेरियाको उत्तरी र मध्य क्षेत्रमा सशस्त्र आक्रमणहरु मुख्य सुरक्षा खतराको रूपमा रहेका छन्, जसका कारण हालैका महिनाहरुमा मृत्यु र अपहरणका घटनाहरू बढेका छन् ।