सिरियाबाट हतियार बोकेका ड्रोन रोकिए

अम्मान । जोर्डन सेनाले शुक्रबार बिहान सिरियाली क्षेत्रबाट आउँदै गरेका युद्ध सामग्री बोकेका ड्रोनलाई रोकेको छ ।

पूर्वी सैन्य क्षेत्रका सेवाकर्मीहरूले अवैध रूपमा प्रवेश गरेको युद्ध सामग्री बोकेको ड्रोनलाई खसालेको राज्य-सञ्चालित पेट्रा समाचार एजेन्सीले जोर्डन सशस्त्र सेनाको स्रोतलाई उद्धृत गर्दै उल्लेख गरेको छ। बरामद भएका सामानहरू सम्बन्धित निकायमा हस्तान्तरण गरिएको छ ।

मङ्गलबार जोर्डन सेनाले सिरियासँगको सिमाना नजिकै लगभग ५०० ग्राम लागुऔषध बोकेको ड्रोनलाई खसालेको पनि सेनाले जनाएको छ । मे महिनामा सेनाले सिरियाबाट जोर्डनमा लागुऔषध तस्करी गर्ने तीनवटा प्रयासलाई विफल पारेको थियो।