सोमबार, माघ २८, २०८१

मध्यपुरथिमिको आम्दानी १४ करोड

नेपालखोज २०८१ माघ ४ गते १८:३४

भक्तपुर । मध्यपुरथिमि नगरपालिकाले चालु आर्थिक वर्षको पहिलो ६ महिनामा १४ करोड रुपैयाँभन्दा बढी राजस्व सङ्कलन गरेको छ । नगरपालिकाले आन्तरिक स्रोतबाट १४ करोड २८ लाख १९ हजार ६९० रुपैयाँ सङ्कलन गरेको हो ।

Advertisement

यो पालिकाको कूल वार्षिक राजस्व सङ्कलन लक्ष्यको ३९.३६ प्रतिशत हो । यहाँ चालु आवमा ३६ करोड २८ लाख सात हजार रुपैयाँ आन्तरिक स्रोतबाट राजस्व सङ्कलन गर्ने लक्ष्य रहेको छ ।

उपप्रमुख विजयकृष्ण श्रेष्ठले गत आर्थिक वर्षको तुलनामा यस वर्ष नक्सा पास कम भएकाले लक्ष्यअनुसार राजस्व सङ्कलन हुन नसकेको जानकारी दिए । गत वर्ष यस नगरपालिकाले घर नक्साको अभिलेखीकरण खुलाएको थियो ।

यस वर्ष घर नक्सा पासमा राजस्व सङ्कलनमा कमी आए पनि व्यवसाय, घरबहाल र विज्ञापन कर शीर्षकमा राजस्व वृद्धि भएको उपप्रमुख श्रेष्ठले बताए । उनका अनुसार व्यवसाय कर, घरबहाल कर र विज्ञापन कर शीर्षकमा गत आवको तुलनामा यस वर्ष दुई करोड ५२ लाख ८९ हजार ८८८ रुपैयाँ भन्दाबढी राजस्व सङ्कलन भएको छ ।

नगरपालिकाले चालु आवको पहिलो छ महिनामा सबैभन्दा धेरै असोजमा तीन करोड ६० लाख ५६ हजार ३७ रुपैयाँ, साउनमा तीन करोड २७ लाख ८५ हजार ४५२ रुपैयाँ र भदौमा दुई करोड ४३ लाख ५३ हजार ४७३ रुपैयाँ आन्तरिक आम्दानी गरेको थियो ।

यसैगरी कात्तिकमा एक करोड ९८ लाख १२ हजार ३६६ रुपैयाँ, मङ्सिरमा दुई करोड ८ लाख १६ हजार १७४ रुपैयाँ र पुसमा सबैभन्दा कम ९४ लाख १७ हजार ९८१ रुपैयाँ राजस्व सङ्कलन गरिएको नगरपालिकाले जनाएको छ ।

प्रतिक्रिया