सोमबार, माघ २८, २०८१

डकुड्रामा ‘मौन’ को फस्टलुक पोस्टर सार्वजनिक, के होला कथा ?

नेपालखोज २०८१ माघ १२ गते १५:५६

काठमाडौं । रिसर्चमा आधारित डकुड्रामा ‘मौन’ को फस्टलुक पोस्टर सार्वजनिक गरिएको छ । सेलिब्रेटी टाइम्सको ब्यानरमा निर्माण गरिएको यस फिल्मलाई विभिन्न फेस्टिवल, च्यारिटी सो तथा विशेष प्रदर्शनमार्फत दर्शकमाझ पुर्याउने तयारी गरिएको छ ।

Advertisement

आज शनिबार सार्वजनिक पोस्टरमा फिल्मकी मुख्य पात्र प्रार्थना पाठकलाई फिचर्ड गरिएको छ । चर्चित कलाकारहरू सरोज खनाल र हिउँवाला गौतम लगायतलाई भने लुकाइएको छ । पोस्टरसँगै फिल्मका मुख्य टिम सदस्यहरू पनि सार्वजनिक गरिएका छन् । 

फिल्मका निर्देशक तथा निर्माता रामजी ज्ञवालीले आफ्नो अफिसियल फेसबुक पेजमार्फत भनेका छन्, ‘मौन’ कुनै व्यावसायिक प्रोजेक्ट मात्र होइन, न त हलमा दर्शक तान्न अनावश्यक भ्रम छर्ने कुनै योजना । यो एउटा वास्तविक जीवनसँग जोडिएको कथा हो, जसले समाजलाई सचेत बनाउन महत्त्वपूर्ण भूमिका खेल्नेछ ।’ 

फिल्मको कथा चर्चित निर्देशक रामशरण पाठकले लेखेका हुन्। सिनेमाटोग्राफी सङ्कल्प भुजेल, सहायक निर्देशन वसन्त अधिकारी तथा पोस्टर फोटो सुट कुवेर डङ्गोलको रहेको छ भने पोस्टर टौवा स्टुडियोमा निर्माण भएको हो । यस प्रोजेक्टमा वरिष्ठ कलाकार सरोज खनाल, हिउँवाला गौतम, नव कलाकार प्रार्थना पाठक, ओजस्वी विक्रम बिस्ट, दिवस नाथ लगायतका कलाकार रहेको जनाइएको छ । फिल्मका सहायक निर्माता हरि क्षेत्री भूपेन्द्र हुन् । 

फिल्मको प्राविधिक पक्षमा भरत कँडेलले साउन्ड डाइनिङ, राजेन्द्र मोक्तानले कलर ग्रेडिङ र नहकुल खड्काले सम्पादनको जिम्मेवारी सम्हालिरहेका छन् । फिल्मको आधिकारिक कथा नखुलाइए पनि निर्देशक ज्ञवालीका अनुसार, ‘मौन’ १ सय  ६८ मिलियनभन्दा बढी व्यक्तिको यथार्थ कथामा आधारित छ । यस डकुड्रामालाई नेपालका विभिन्न स्कुल, कलेज तथा सङ्घसंस्थामा विशेष सोमार्फत प्रदर्शन गरिने बताइएको छ । फिल्म चाँडै दर्शकमाझ आउने तयारीमा रहेको निर्माण टिमले जनाएको छ ।

निर्माता तथा निर्देशक रामजी ज्ञवाली, एक दशक लामो पत्रकारिता यात्रा पश्चात् फिल्म निर्देशनमा प्रवेश गरेका हुन् । उनको प्रतीक्षित डकुमेन्ट्री सर्ट फिल्म ‘रित्तो गाउँ’ १ वर्षअघि  तयार भई हाल विभिन्न फिल्म फेस्टिभल तथा च्यारिटी सोहरूमा प्रदर्शन भइरहेको छ ।

त्यस्तै, उनको अर्को महत्त्वपूर्ण प्रोजेक्ट ‘मौन’लाई पनि अवार्ड, विशेष प्रदर्शन तथा च्यारिटी सोमा सहभागिता गराउने योजना रहेको छ । निर्देशक ज्ञवालीले यसअघि ‘डार्कमुन,’ ‘लापत्ता सन्तान,’ ‘हनिमुन,’ ‘आराध्य,’ ‘लिलामी’ लगायतका चर्चित सर्ट फिल्महरूका साथै केही डकुमेन्ट्री तथा दर्जनौँ म्युजिक भिडियो निर्देशन गरिसकेका छन् । 

प्रतिक्रिया