बुधबार, कार्तिक ५, २०७७

नेपाल प्रहरीमा साढे ३ हजार दरबन्दी थपियो, युवालाई जागिरको अवसर

नेपालखोज २०७६ असोज २८ गते १५:००

२८ असोज, काठमाडौँ। नेपाल प्रहरीमा ३ हजार ५ सय ९६ दरबन्दी थपिएको छ । मन्त्रिपरिषद बैठकले गृह मन्त्रालयको प्रस्ताव स्वीकृत गरेसँगै प्रहरीमा दरबन्दी थपिएको हो । दरबन्दी स्वीकृतिसँगै कार्यान्वयनका लागि प्रहरी प्रधान कार्यालयलाई पत्र आईसकेको केन्द्रीय प्रहरी प्रवक्ता डीआईजी विश्वराज पोखरेलले जानकारी दिए ।

थपिएका दरबन्दीमा ३ प्रहरी वरिष्ठ उपरीक्षक (एसएसपी), चार जना प्रहरी उपरीक्षक (एसपी), २१ जना प्रहरी नायब उपरीक्षक (डीएसपी) र प्रहरी निरीक्षक (इन्स्पेक्टर) ४७ छन् । प्रहरी नायब निरीक्षक (सई )८६, प्रहरी सहायक निरीक्षक (असई) २ सय ९७, प्रहरी हवल्दार ६ सय ८३, प्रहरी जवान २ हाजार २ सय १६ र कार्यालय सहयागीतर्फ ३ हजार ५ सय ९६ दरबन्दी थप भएको छ ।

थप गरिएको दरबन्दी जनपद र प्राविधिक दुवै गरेर हो । प्राविधिकतर्फ १ सय २९ जनाको दरबन्दी थपिएको छ । एसएसपी १, एसपी २, डीएसपी १२, इन्सपेक्टर २० लगायत गरी १२९ जनाको दरबन्दी थपिएको हो ।

समय अनुकुल संगठनको स्रोत, साधान विकास गर्ने क्रममा जनशक्ति विकास गर्नु पर्ने हुँदा दरबन्दी थपिएको जानकारी दिदै प्रवक्ता पोखरेलले थपिएका दरबन्दी भर्ना र बढुवा प्रक्रियाबाट पदपूर्ती गरिने जानकारी दिए ।

हाल प्रहरीमा जनपद र प्राविधिक गरी ७५ हजार ९ सय २७ को दरबन्दी छ । तीमध्ये करिब ४ हजारको अझै पदपूर्ति भएको छैन ।

एसएसपी बढुवा गरेर गौतम बुद्ध विमानस्थल सुरक्षा, समुदाय प्रहरी साझेदारी कार्यक्रम र ब्याण्ड बाजाको नेतृत्व दिने प्रहरी तयारी छ ।

प्रतिक्रिया