आतंकवादी हमला हुनसक्ने भन्दै दिल्लीमा कडा सुरक्षा

काठमाडौं । नयाँदिल्लीमा यति बेला उच्च सुरक्षा सतर्कता अपनाइएको छ । जैश-ए-मोहम्मदले ४ सय बढी स्थानमा आक्रमण गर्ने सूचना आएको भन्दै भारतको नयाँदिल्लीमा उच्च सुरक्षा सतर्कता अपनाइएको छ । गुप्तचर एजेन्सीका अनुसार आतंकवादी संगठन जैश-ए-मोहम्मद केही दिन देखि भारतमा ठूलो आक्रमण गर्ने तयारीमा छन् । प्रहरीले सूचना पाएलगत्तै हाई अलर्ट जारी गरेको भारतीय मिडियाहरुले जनाएका छन् ।

रोहिणी, दिल्ली उत्तरपूर्व, उत्तरपश्चिम, उत्तर, नयाँदिल्ली, द्वारका, पूर्वी र मध्य क्षेत्रका चार सय बढी भवन र केही बजारलाई आतंकवादी समूहले निशाना बनाउन सक्ने गुप्तचर अधिकारीहरुको भनाइ छ । यी क्षेत्रमा ४ सय २५ यस्ता भवनहरु छन्, जसको सुरक्षामा चौबीसै घण्टा सुरक्षाकर्मी तैनाथ हुन्छन् । यस्तै २ सय भवनलाई भीआईपी क्षेत्र भनेर तोकिएको छ । दिल्ली प्रहरीले सुरक्षा व्यवस्था कडा पार्दै ती सबै स्थानहरुमा थप सुरक्षाकर्मी परिचालन गरेको छ ।

३ मे २०१६ मा दिल्लीको चाँदबाग क्षेत्रबाट पक्राउ परेका जैश-ए-मोहम्मदका तीन सदस्यहरुले दिल्लीमा आक्रमण गर्ने योजनाको खुलासा गरेका थिए । उनीहरुलाई शरण दिने १० भन्दा बढी व्यक्ति पनि पक्राउ परेका थिए ।