बिहीबार, कार्तिक १३, २०७७

किन बाहिरियो समाजवादी पार्टी सरकारबाट

नेपालखोज २०७६ पुष ८ गते १४:३०

८ पुस, काठमाडौं । दुई तिहाई सरकार बनाउनका लागि महत्वपूर्ण भूमिका खेलको समाजवादी पार्टी सरकारबाट बाहिरिएको छ । नेपाल कम्युनिष्ट पार्टी (नेकपा) सँग गरेको संविधान संशोधनलगायत दुईबुँदे सहमति कार्यान्वयन नभएको भन्दै पार्टीले आफू सरकारबाट बाहिरिएको घोषणा गरेको हो । सो पार्टीका अध्यक्षसमेत रहेका उपप्रधानमन्त्री उपेन्द्र यादवले आफूले पदबाट राजीनामा दिएको विज्ञप्तिमार्फत जानकारी दिएका थिए ।

कानून, न्याय तथा संसदीय मामिलामन्त्री यादवले पुस ७ गतेको मन्त्रिपरिषद् बैठकमा आफूले संविधान संशोधनका लागि आवश्यक गृहकार्य गर्न संविधान विज्ञ सम्मिलित विज्ञ सुझाव समिति गठन गर्न गरेको प्रस्तावलाई अस्वीकार गरेकाले’ आफूले मन्त्रीबाट राजीनामा दिएको उल्लेख गरेका छन् । “दुईबुँदे सहमतिबाट सरकार पछि हटेको तथा सहमतिलाई एकतर्फी रुपमा तोडेको प्रष्ट भएकोले नैतिकताको आधारमा सरकारमा बसिरहन औचित्य नभएको हुँदा आजकै मितिबाट लागू हुने गरी उपप्रधानमन्त्री एवं कानून, न्याय तथा संसदीय मामिलामन्त्री पदबाट राजीनामा दिएको व्यहोरा अनुरोध गर्दछु” विज्ञप्तिमा भनिएको छ ।

तत्कालीन सङ्घीय समाजवादी पार्टी फोरम संविधान संशोधनलगायत माग पूरा गर्ने शर्तमा सरकारमा सहभागी भएको थियो । समाजवादीले मन्त्रिपरिषद् बैठक तथा संसद्मा पटक पटक विषय प्रवेश गराउनाका साथै संविधानलगायत विषय राखी प्रधानमन्त्रीसमक्ष स्मरणपत्र पनि दिएको तर सुनुवाइ नभएको आरोप लगाएको छ ।

प्रतिक्रिया