संविधान दिवस नमनाउन र विरोध गर्न जसपाको आह्वान

काठमाडौं । संसदको तेस्रो ठूलो दल जनता समाजवादी पार्टीले गत वर्ष जस्तै यस वर्ष पनि संविधान दिवस नमनाउन र विरोध गर्न आह्वान गरेको छ ।

पाँच वर्षअघि संविधान घोषणा हुँदादेखि नै जसपामा आबद्ध दलहरुले असन्तुष्टि र विरोध जनाउँदै आएका छन् । संशोधन नभएसम्म संविधान विभेदकारी भएको आरोप लगाउँदै आएका उनीहरुले असोज ३ गतको संविधान दिवसलाई अस्वीकार गर्न आफ्ना कार्यकर्तालाई निर्देशन दिएका हुन् ।

अघिल्ला वर्षहरुमा जसपामा आबद्ध दल राजपा र संघीय समाजवादीले असोज ३ गतेलाई ‘कालो दिन’को रुपमा घोषणा गरेर संविधानको विरोध गरेका थिए ।

तर यस वर्ष भने संविधानको पक्षमा हुने कार्यक्रममा भाग नलिने, विरोध जनाउने निर्णय अध्यक्षद्वय महन्थ ठाकुर र उपेन्द्र यादवले जारी गरेको विज्ञप्तीमा भनिएको छ ।