गौतम बुद्ध कपको उपाधि राप्तीलाई

चितवन । चितवनस्थित धुर्मुस सुन्तली फाउन्डेसनले निर्माण गरिरहेको गौतम बुद्ध अन्तर्राष्ट्रिय क्रिकेट रंगशालाको नमुना मैदानमा भएको गौतम बुद्ध कपको उपाधि राप्ती टिमले जितेको छ।

मंगलबार भएको उपाधि भिडन्तमा राप्तीले टिम नारायणीलाई ९ रनले पराजित गर्दै उपाधि जितेको हो।

राप्तीले दिएको १४४ रनको लक्ष्य पछ्याएको नारायणीले २० ओभरमा ९ विकेटको क्षतिमा १३४ रन मात्र जोड्न सक्यो।

१९ ओभरमा नारायणीले आरिफ शेखलाई ४८ रन तथा कप्तान कराण केसीलाई १ रनमा गुमाएको थियो। दुवैलाई राप्तीका अभिनास बोहराले आउट गरे।

अन्तिम ओभरमा १७ रन चाहिएको अवस्थामा नारायणीका किशोर महतो र सिद्धान लोहनी आउट भए।

नारायणीका लागि आरिफले सर्वाधिक ४८ रन जोड्दा रित गौतम र इशान पाण्डेले समान २७–२७ रन जोडे।

बलिङमा राप्तीका अभिनासले ३ विकेट लिँदा भुवन कार्कीले २ विकेट हात पारे। जितेन्द्र मुखिया र कमलसिंह ऐरीको नाममा १-१ विकेट रह्यो।

त्यसअघि पहिले ब्याटिङ गरेको राप्तीले २० ओभरमा ८ विकेटको क्षतिमा १४३ रन जोड्यो।

राप्तीका लागि कुशल भुर्तेलले ४२ रन जोडे। उनले ३१ बलमा २ चौका र ४ छक्का हिर्काए। विनोद भण्डारीले २१ बलमा ४ चौका र १ छक्काको मद्दतमा ३३ रन जोडे।

सुमित महर्जनले २२ रन र अमित श्रेष्ठले १८ रनको योगदान दिए।

बलिङमा नारायणीका सहाब अलामले ३ विकेट लिए भने सुसन भारीले २ विकेट हात पारे।

प्रतियोगिता बागमती प्रदेश क्रिकेट संघले आयोजना गरेको हो। यो प्रतियोगिता कोरोना भाइरसपछि आयोजना गरिएको पहिलो क्रिकेट प्रतिस्पर्धा हो।