१४ वर्षीया बालिकालाई जबरजस्ती करणी गरेको अभियोगमा युवक पक्राउ

काठमाडौं । १४ वर्षीया बालिकालाई जबरजस्ती करणी गरेको अभियोगमा काठमाडौं महानगरपालिका ३२ कोटेश्वरस्थित लक्ष्मी स्वीट पसलमा काम गर्ने धनुषा महेन्द्रनगर नगरपालिका ५ घर भएका २१ वर्षीय दिपेन्द्र मण्डललाई शनिबार साँझ प्रहरीले पक्राउ गरेको छ ।

मण्डलले ती बालिकालाई जबरजस्ती करणी गरेको भन्ने खबर प्राप्त हुनासाथ महानगरीय प्रभाग कोटेश्वरबाट खटिएको प्रहरीले उनलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।

एक थान भरुवा बन्दुक बरामद
शंखरापुर नगरपालिका ३ बोझिनीस्थित जंगलबाट १ थान भरुवा बन्दुक शनिबार दिउँसो प्रहरीले बरामद गरेको छ । महानगरीय प्रहरी प्रभाग साँखुबाट खटिएको गस्ती टोलीलाई देख्नासाथ तीन जना अपरिचित व्यक्तिहरु उक्त बन्दुक जंगलमा फाली फरार भएपछि प्रहरीले बरामद गरेको हो । फरार व्यक्तिहरूको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको छ

सुनका गहना तथा नगद चोरी
ललितपुर महानगरपालिका १ कुपण्डोल बस्ने प्रेम कुमारी श्रेष्ठको घरबाट झ्यालको ग्रिल फोडेर चुक्कुल खोली दराजभित्रको नगद तीन लाख रुपैयाँ र पाँच तोला बराबरका सुनका विभिन्न गहना गरी करिब सात लाख ५० हजार रुपैयाँ बराबरको धनमाल शनिबार चोरी भएको छ ।

चोरी संलग्न व्यक्तिहरूको खोजी गर्नुका साथै यस सम्बन्धमा प्रहरीले थप अनुसन्धान गरिरहेको जानकारी दिएको छ ।