नेपाल-खनाल पक्षले पनि बोलायो सांसदहरूको भेला

काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीले आज बिहान ११ बजे बालुवाटारमा संसदीय दलको बैठक बोलाएकैं बेला नेकपा एमालेको नेपाल-खनाल पक्षले पनि सांसदहरुको भेला बोलाएको छ । बिहान १० बजे सांसदहरुलाई हेरिटेज गार्डेनमा बोलाइएको नेता विष्णु रिजालले जानकारी दिए ।

ओलीले बोलाएको संसदीय बैठकअघि नै नेपाल-खनाल पक्षले सांसदहरुलाई बोलाएको हो । नेपाल-खनाल पक्षले भने ओलीले बालुवाटारमा बोलाएको संसदीय दलको बैठकमा नजाने बताएको छ ।

एमालेको नेपाल समूहका नेताहरूले संसदीय दलको बैठकबारे जानकारी प्राप्त भएको तर समय अनुकूल नभएकाले जान नसक्ने बताएका हुन् । नेता योगेश भट्टराईले राष्ट्रिय कार्यकर्ता भेला चलिरहेको थाहा पाउँदापाउँदै संसदीय दलको बैठक बोलाइएकोले आफूहरू उपस्थित हुन नसक्ने बताएका छन् ।

‘संसदीय दलका नेता, प्रधानमन्त्री, संसदीय दलको कार्यालयलाई यो कुरा राम्रोसँग जानकारी थियो कि एमालेको राष्ट्रिय कार्यकर्ता भेला भइरहेको छ । संघीय सांसद, प्रदेश सांसद र संसदीय फाँटका व्यक्तिहरूको यहाँ उपस्थिति छ भन्ने उहाँहरूलाई राम्रोसँग थाहा थियो,’ उनले भने ।

बुधबारदेखि सुरु भएको खनाल-नेपाल समूहको राष्ट्रिय कार्यकर्ता भेला बिहीबार सकिँदै छ । १२० सदस्यीय एमाले संसदीय दलमा नेपाल-खनाल पक्षका ४० सांसद छन् ।