विराजलाई सुखद् अन्त्यको सुनौलो अवसर (भिडियोसहित)

काठमाडौं । सर्वाधिक सफल कप्तानको परिचय पाएका विराज महर्जनले सोमबार फुटबलबाट सन्यासको घोषणा गरेका छन् । अन्र्राष्ट्रिय प्रतियोगितामा नेपालले गोलको खडेरी तोडेको दिने बंगलादेशलाई हराउँदै त्रिदेशीय कपको उपाधि जित्दा डिफेन्डर विराजले टोलीलाई उपाधिको ताज पहिराउँदै सन्यासको घोषणा गरेका हुन् । उपाधि जितेको नेपाललाई खुुसीसँगै विराजको सन्यासले केही भावुक पनि बनायो ।

अखिल नेपाल फुटबल संघ (एन्फा) एकेडेमीका दोस्रो ब्याच विराज महर्जनले सोमबार ७३औं अन्तर्राष्ट्रिय खेल करियर खेल्दै सन्यासको घोषणा गरेका छन् । दशरथ रंगशालामा सोमबार त्रिदेशीय कप फुटबल प्रतियोगितामा नेपालले बंगलादेशको टोलीलाई २–१ ले हराउँदै उपाधि दिलाएसँगै विराजले सन्यासको घोषणा गरेका हुन् । अन्तिम पटक दशरथ रंगशालामा राष्ट्रिय जर्सीमा देखिएका विराजलाई समर्थकले सम्मान दिएका थिए ।

डेढ वर्षे अन्तर्राष्ट्रिय गोलविहिन नेपाली फुटबलको यात्रालाई पूर्णविराम लगाउँदै नेपालले ३७ वर्ष पछि नेपाली मैदानमा अन्तर्राष्ट्रिय उपाधि उचाल्दा विराजलाई सुखद अन्त्यको सुनौलो अवसर पनि मिल्यो । उपाधि उचाल्दै फुटबल करियरलाई अन्त्य गर्न पाउँदा विराज खुसी सँगै भावुक पनि देखिन्थे ।

बंगलादेशविरुद्धको फाइनल खेलमा विराजले नेपालका लागि खेलेको ७३औं प्रतिस्पर्धा रह्यो । बैकल्पिक खेलाडीका रूपमा ९०औं मिनेटमा मैदानमा प्रवेश गरेर अन्तिम खेल सुखद बनाउने अवसर विराजले पाउएका हुन् । सन् २००८ मा पोखरामा भएको पाकिस्तानविरुद्धको अन्तर्राष्ट्रिय मैत्रिपूर्ण खेलमा डेब्यु गरेका विराजले यस अघि राजु शाक्यको नाममा रहेको ६८ क्यापलाई उछिनेर नेपालका लागि सर्वाधिक खेल खेल्ने खेलाडी पनि बनेका छन् ।

कुल १८ पटक नेपाली टोलीको कप्तानी सम्हालेका विराजले २०१५ केरालामा भएको साफ च्याम्पियनसिपमा भारतविरुद्धको खेलमा कप्तानको आर्मब्यान्ड पहिरिनु भएका थिए । विभिन्न क्लब र राष्ट्रिय टोलीमा इन आउट हुँदै फुटबल खेलेका विराजले यस अघि अन्तिम पटक सन २०१९ मा मलेसियाविरुद्ध मैत्रीपूर्ण खेल खेलेका थिए ।

थ्री स्टार, मनाङ मस्र्याङ्दीका लागि तीन लिग उपाधि दिलाएका विराजको कप्तानीमा सन २०१६ मा बंगबन्धु गोल्डकप र सोही वर्षको सोलिडारिटी कपको उपाधि नेपालले हात पारेको थियो । नेपालले १२ औं दक्षिण एसियाली खेलकुदको पुरुष फुटबलमा स्वर्ण पदक जित्दा विराजनले नै कप्तानी समालेका थिए । सोही आधारलाई मान्दा विराज सर्वाधिक सफल खेलाडीको रुपमा परिचय स्थापीत गराएका छन् । सन्यासको घोषणा गरेका विराजले फुटबल गतिविधिबाट टाढा रहन नसक्ने प्रतिक्रिया दिएका छन् ।