प्रचण्डको दावी- अब चाँडै नयाँ सरकार गठन हुन्छ

काठमाडौं । नेकपा माओवादी केन्द्रका अध्यक्ष अध्यक्ष पुष्पकमल दाहाल प्रचण्डले अब चाँडै नयाँ सरकार गठन हुने दाबी गरेका छन् । उनले चाँडै ओली सरकार हट्ने बताउँदै केही दिनमै नयाँ सरकार गठन हुने बताए ।

नेपाल राष्ट्रिय कर्मचारी संगठन निजामति चौथो केन्द्रीय परिषद्को कार्यक्रमलाई सम्बोधन गर्दै अध्यक्ष प्रचण्डले नयाँ सरकारले प्रधानमन्त्री केपी शर्मा ओलीले देशमा लगाउन खोजेको कालो बादल हटाउने बताए ।

उनले भने, ‘अब चाँडै नयाँ सरकार गठन हुन्छ । सरकारको नेतृत्वमा को जान्छ भन्ने महत्वपूर्ण होइन। प्रधानमन्त्री को भन्दा पनि सरकार संविधानअनुसार चल्ने हुनुपर्छ भन्ने हाम्रो कुरा हो। अब यो सरकार धेरै दिन टिक्दैन।’

प्रचण्डले ओली सरकारले संविधान मिच्ने प्रयास गरेको भन्दै संविधान विपरीत काम गर्ने प्रधानमन्त्रीलाई पदमा राख्न नहुने बताए । उनले भने, ‘राष्ट्र र जनताको विषयको पक्षमा मिलेर आन्दोलन गरेका थियौँ। एकताको बेलामा जुन लक्ष्यका साथ गरेका थियौँ त्यो पुरा हुन सकेको छैन । संविधानलाई मिच्ने प्रयास भइरह्यो भने केही समय पछि नै हामी विद्रोहमा जानुपर्ने हुनसक्छ। त्यसका लागि हामी शान्तिपूर्ण विद्रोह गछौँ।’

उनले प्रधानमन्त्री ओलीले नैतिकताको आधारमा राजीनामा दिनुपर्ने कुरा दोहोर्‍याएका छन् । उनले भने, ‘संसदीय दलको नेताबाट हटेपछि प्रधानमन्त्रीबाट राजीनामा दिनुपर्ने हो। तर, पार्टी सदस्यबाट हटेको मान्छेलाई पनि फेरि पार्टी अध्यक्षमा फर्काइदियो। यस्तो विचित्रको निर्णय अरू कही पनि हुँदैन। सेटिङमा गरे भन्छन्। कस-कसको कहाँ-कहाँको सेटिङ हो ।’