सरकारलाई दिएको समर्थन फिर्ता लिने अधिकार प्रचण्डलाई

काठमाडौं । नेकपा(माओवादी केन्द्र)ले सरकारलाई दिएको समर्थन फिर्ता गर्ने सम्बन्धमा निर्णय गर्ने अधिकार अध्यक्ष पुष्पकमल दाहाल प्रचण्डलाई दिएको छ ।

आज पार्टी केन्द्रीय कार्यालय पेरिसडाँडाँमा बसेको स्थायी कमिटी बैठकले सरकारलाई दिएको समर्थन फिर्ताको औपचारिक निर्णय गर्ने अधिकार अध्यक्ष प्रचण्डलाई दिएको नेता नारायणकाजी श्रेष्ठले बताए ।

उनले भने, ‘वर्तमान केपी ओली प्रधानमन्त्री रहेको यो सरकारलाई हाम्रो पार्टीको समर्थन नरहेको बारेमा औपचारिक जानकारी दिने प्रश्न हो त्योबारेमा कहिले दिने औपचारिक लिखित जानकारी भन्ने बारेमा निर्णय गर्ने अधिकार अध्यक्ष प्रचण्डलाई दिइएको छ ।’

बैठकले राष्ट्रिय एकता, राष्ट्रिय स्वाधिनताको रक्षा र लोकतान्त्रिक शक्तिहरुको एकता, कम्युनिष्ट आन्दोलनको रक्षालाई केन्द्रबिन्दुमा राखेर नीति, योजना र कार्यक्रमहरु अगाडी बढाउने र सोही आधारमा अन्य राजनीतिक पार्टी र सामाजिक शक्तिहरुसँग छलफल अगाडी बढाउने निष्कर्ष निकालेको पनि नेता श्रेष्ठले बताए ।

‘यो स्थायी कमिटीको बैठकले सिङ्गो राष्ट्रको एकता र राष्ट्रिय स्वाधिनताको रक्षा, सम्पूर्ण लोकतान्त्रिक शक्तिहरुको एकता र संविधान र लोकतन्त्रको रक्षा, सच्चा कम्युनिष्टहरुको एकता र कम्युनिष्ट आन्दोलनको रक्षालाई केन्द्रबिन्दुमा राखेर सम्पूर्ण नीति, योजना, कार्यक्रम र गतिविधि अगाडी बढाउने निष्कर्ष निकालेको छ,ु उनले भने, ुत्यस आधारमा नै अरु सबै राजनीतिक पार्टीहरुसँग, सामाजिक शक्तिहरुसँग, देशभक्त शक्तिहरुसँग छलफलको प्रक्रिया अगाडी बढाउने निष्कर्ष पनि निकालेको छ ।’

बैठकमा संशोधित विधानको मस्यौदामा स्थायी कमिटी सदस्यहरुले आफ्नो विचार राखेका थिए । संशोधित विधान मस्यौदालाई केन्द्रीय कार्यालयले अन्तिम रुप दिएर आगामी केन्द्रीय कमिटी बैठकमा प्रस्तावको रुपमा अगाडी बढाउने निर्णय पनि बैठकले गरेको छ ।

सङ्गठनात्मक कार्यदलले संशोधित विधान मस्यौदाको आधारमा सङ्गठनात्मक कार्ययोजना तयार गरी आमामी स्थायी कमिटी बैठकमा पेश गर्ने तथा अध्यक्ष प्रचण्डले राजनीतिक प्रतिवेदन तयार गरी स्थायी कमिटी बैठकमा प्रस्ताव पेश गर्ने र केन्द्रीय कमिटी बैठकमा प्रस्तावको रुपमा लैजाने निष्कर्ष पनि बैठकले निकालेको छ ।

त्यस्तै, कोभिड–१९ को बारेमा जनता समक्ष सचेतता अपनाउन र यसका विरुद्ध अभियान, जनचेतनामुलक र जागरण अभियान सञ्चालन गरी सहयोगको भूमिका निर्वाह गर्न पार्टीको सम्पूर्ण कमिटीलाई निर्देशन दिइएको पनि नेता नारायणकाजी श्रेष्ठले जानकारी दिए । कोभिड–१९ संक्रमणको अवस्थालाई नियालेर छिट्टै केन्द्रीय कमिटीको बैठकको मिति तय गरिने पनि उनले बताएका छन् ।