‘कोभिडले चलचित्र क्षेत्रमा पारेको असरबारे सरकारलाई जानकारी छ’

काठमाडौं । परराष्ट्रमन्त्री प्रदीपकुमार ज्ञवालीले कोभिड-१९ का कारण चलचित्र क्षेत्रले भोगिरहेको समस्याबारे सरकार जानकार रहेको बताएका छन् ।

काठमाडौंमा शुक्रबार ‘नेपाल-अफ्रिका फिल्म फेस्टिभल, २०२१’ को उद्घाटन गर्दै परराष्ट्रमन्त्री ज्ञवालीले कोभिड-१९ को कारण नेपाली चलचित्र क्षेत्रमा परेको प्रभावबारे सरकारलाई जानकारी रहेको र यस क्षेत्रलाई पुनर्बहाली गर्न सरकारले विभिन्न ढंगले प्रयासहरु पनि गरिरहेको बताए । सरकारले नेपाली चलचित्रहरुको अन्तर्राष्ट्रियकरण गर्न विदेशमा नेपाल फिल्म भेस्टिभल आयोजना गर्ने विषयमा छलफल गर्ने बताए । ‘कोभिडले पारेको असर नेपालको फिल्म क्षेत्रले कसरी भोगिरहेको छ भन्नेबारे सरकार जानकार छ । यो क्षेत्रलाई कसरी रिभाइभ गर्न सकिन्छ, फिल्म निर्माता, कलाकार, हल सञ्चालक, प्राविधिकहरु, हजारौँ फिल्म उद्योगमाथि आश्रित हुनुहुन्छ । उहाँहरुलाई परेको कठिनाइका बारेमा सरकारलाई जानकारी छ । त्यसका निम्ति विभिन्न ढङ्गले हामीले प्रयासहरु पनि गरिरहेका छौँ,’ उनले भने, ‘नेपाली फिल्महरुको अन्तर्राष्ट्रियकरण गर्ने, फेस्टिभलको माध्यमबाट अन्तर्राष्ट्रिय क्षेत्र, मञ्चहरुबाट प्रदर्शित गर्ने विषयमा कसरी अगाडि बढ्न सकिन्छ, नेपाल फिल्म फेस्टिभल कसरी आयोजना गर्न सकिन्छ अन्तर्राष्ट्रिय रुपमा, हामी छलफल गर्नेछौं ।’

काठमाडौंस्थित राष्ट्रिय नाचघरमा शुक्रबारदेखि नेपाल-अफ्रिका फिल्म फेस्टिभल सुरु भएको हो । फेस्टिभल वैशाख १२ गतेसम्म चल्नेछ । नेपाल अफ्रिका फिल्म फेस्टिभलकी निर्देशक मञ्जु मिश्रले ५४ वटा अफ्रिकी देशहरुको प्रतिनिधित्व फिल्म फेस्टिभलमार्फत गर्न खोजिएको बताइन् । फिल्म फेस्टिभलमा नेपाली फिल्महरु पनि प्रदर्शन गरिने उनले बताइन् । नेपाल र अफ्रिकाबीचको दूरी घटाउँदै अफ्रिकीहरुको जीवनस्तर, सामाजिक परिवेश, संस्कृति र रहनसहन बुझ्नका लागि यस फिल्म फेस्टिभलले सहयोग गर्ने पनि उनले बताइन् ।

चलचित्र निर्माता संघका अध्यक्ष आकाश अधिकारीले नेपाल अफ्रिका फिल्म फेस्टिभलले नेपाल र अफ्रिकाबीचको रहनसहन, भाषा, सभ्यतालाई नजिक बनाउने बताए । दुई देशबीचको मित्रतालाई अघि बढाउन मद्दत पुग्ने पनि उनको भनाइ छ ।

अधिकारीले विदेशमा छरिएर रहेका नेपालीहरुले पनि नेपाली फिल्म फेस्टिभल गर्ने कुराको प्रतीक्षामा रहेको बताए । छिटोभन्दा छिटो नेपाली सिनेमाहरु पनि विश्वभर पुग्नेमा आफू आशावादी रहेको अधिकारीले बताए ।