राम्राेसँग रणनीति अपनाउन नसक्दा कोरोना संक्रमणको जोखिम बढ्यो

संकट व्यवस्थापन विज्ञ डाक्टर राम थपलियाले कोरोना महामारीले निम्त्याएको संकट व्यवस्थापन गर्न सरकार असफल भएको बताएका छन् । कोरोना महामारी रोक्न बहुमपक्षीय र बहुसरोकारवाला व्यवस्थापन रणनीति अपनाउन नसक्दा कोरोना संक्रमणको जोखिम बढेको बताएका हुन् ।

शुक्रबार न्युज एजेन्सी नेपालसंग कुरा गर्दै डा. थपलियाले संकट व्यवस्थापनको लागि राजनैतिक नेतृत्वमा एकदलको र एक व्यक्ति हावी हुँदा संकट गहिरिदै गएको बताए ।

यो संकट समाधान प्रभावकारी ढंगले हुन नसक्दा जनमानस र आर्थिक क्षेत्रमा नकारात्मक असर पर्न थालेको बताए । संकट व्यवस्थापनको लागि आवश्यक शासकीय संरचनामा परिवर्तन गर्न नसके नेपालले कोरोना महामारीबाट छुटकारा पाउन अझै केही वर्ष लाग्ने बताए । संकटको यो अवस्थाले राजनैतिक अस्थिरता र अराजकता निम्त्याउन सक्ने खतरा रहेको पनि उहाँले बताउनुभयो । प्रस्तुत छ न्युज एजेन्सी नेपालले संकट व्यव्स्थापन विज्ञ डाक्टर थपलियासंग गरिएको संवादको संपादित अंश ।

संकट व्यवस्थापनको परिभाषा भित्र यो संकट(कोभिड१९ महामारी) कस्तो हो ?

यो संकटको सबै भन्दा महत्वपूर्ण पक्ष भनेको जोखिमको सञ्चार रणनीति राज्यपक्षले ल्याउनुपर्ने थियो । जुन जोखिमको सञ्चारले हामीहरुलाई मात्रै नभएर हाम्रो र कुटनीतिक दृष्टिकोणले अन्य मुलुकहरुसँग पनि एउटै पानामा आएर मुलुकका सबै पक्षसँग , सबै पक्षलाई समेटेर जसरी समाधान गर्नुपर्ने संकट हो, त्यो नभइकन केवल सुरुसुरुमै हामीले यो संकट पनि सामान्य स्वास्थ्य संकट हो यसमा समाधान कसले कसरी काम गर्छ भनेर सुरक्षा निकायहरुको बढी भर पर्ने र सुरक्षा निकायहरुको दुरुपयोग गर्ने काम पनि भए ।

त्यसैले यो संकट चाहीँ नितान्त राजनीतिक दृष्टिकोणले मात्रै नभइकन सबै दृष्टिकोणले समेटर बहुआयामिक क्षेत्रलाई पनि अंगालेर समाधान गर्नुपर्ने थियो । त्यो हुन सकेन । त्यो चाहीँ समाधान गर्ने प्रक्रियाहरु फरक छ । जहाँसम्म संकटको फरक के छ भन्ने कुरामा, यो संकट हामीकहाँ जतिबेला सुरु भयो, त्यत्तिखेर यसलाई सम्बोधन गर्ने, उपचार गर्ने हामीसँग कुनै पनि प्रविधि थिएन ।

विश्वमा नै थिएन । तर हामीसँग के चाहीँ थियो भने यसलाई व्यवस्थापन र न्यूनीकरण कसरी गर्न सकिन्छ र यसलाई राज्यले कसरी सम्बोधन गरेर सकेसम्म यो जोखिमतालाई हामीभित्र न्यूनतम विन्दुमा झार्न सकिन्थ्यो, जुन संसारका कतिपय देशहरुले गरेको देखिन्छ , त्यो चाहीँ हामीबाट हुन सकेन । त्यसैले यो अज्ञानता, अव्यवहारिक र नितान्त नेतृत्वको फेलियर भएको संकट हो ।

संकट व्यवस्थापनकमा हाम्रो शासकीय संरचनाको भूमिका रहन्छ ? कसरी ?

रहन्छ । किन रहन्छ भने यो संकटलाई हामीले जसरी हेर्याैं त्यसरी बुझ्दैछौं । जसरी देखिरहेका छौं । यसलाई रिक्स कक्युनिकेसनमा पोलिटिकल डिसिजन भन्छ । यो संकट केवल स्वास्थ्यकर्मीहरु र स्वास्थ्यसँग संलग्न अस्पतालहरुले मात्रै समाधान गर्ने संकट होइन । यो संकट राजनीतिक दृष्टिकोणले पनि यसको मुहानमा गएर कसरी सबैभन्दा न्युनतम विन्दुमा झार्न सक्छौ ? त्यो गर्ने दायित्व चाहीँ राज्यको हो । विज्ञानले प्रमाणित गरिसकेर यो चाहीँ गर्नुथ्र्यो भन्ने नभएको हुँदा देश र अन्तराष्ट्रिय रुपमा सबैतिर परिचालन गर्नुपर्ने अवस्थामा यो नितान्त राज्यको दायित्व हो । नेतृत्वको दायित्व हो । सरकारको दायित्व हो । त्यसमा स्वास्थ्यकर्मी लगायत अन्य प्रत्यक्ष अप्रत्यक्ष संलग्न मानिसहरुले केबल साथ मात्रै दिने हो । अरु केही गर्न सक्दैनन् ।

हामीले कस्तो व्यवस्थापकिय संरचना बनाउनुपथ्र्यो ? अहिले राज्यले अख्तियार व्यवस्थापकिय संरचनामा के के भएका छन् ?
तात्कालिन र दीर्घकालिन रणनीति अत्यन्तै अभाव भयो । संक्रमण चीनको वुहानबाट सुरु भयो । चीनले यसको व्यवस्थापन गरेको थियो र विश्व स्वास्थ्य संगठनले पनि यसबारे भनिरहेको थियो, त्यसबेला हामीले जसरी यसको सूचनाको प्रवाह गर्नुपथ्र्यो तमाम देशवासीहरुलाई र यो सँग प्रत्यक्ष अप्रत्यक्ष रुपमा स्वास्थ्यसँग संलग्न जनसमुदायहरुलाई ,त्यो काम हुन सकेन ।

अर्को भनेको नीजि स्वास्थ्य क्षेत्रलाई पनि समेटेर जानुपर्ने थियो । नीजी क्षेत्रलाई पुर्ण रुपमा वेवास्ता गरियो र संलग्न नै गराइएन । राज्यले स्वास्थ्य मन्त्रालय लगायत सरकारी अस्पतालले नै व्यवस्थापन गर्छन् भनियो ।

यो पनि गम्भीर भुल गरियो । अनुसन्धानमुलक शैक्षिक संरचनामा जानुपर्नेमा त्यो पनि हुन सकेन । जोखिमपुर्ण समुदायहरु वृद्ध, दीर्घरोगी लगायतको पहिचान गरेर लेखाजोखा गरेर समस्या समाधान र रणनीति बनाउने काम हुन सकेन ।

यस्ता संकटहरु समयमै व्यवस्थापन नहुँदा नकारात्मक असर छोड्छन् । यस्तै संकटबाट गृहयुद्ध हुने, अराजकता फैलिने जस्ता कुराहरु पनि हुनसक्छ । यसलाई कसरी हेर्नुभएको छ हामीले यसैगरी व्यवस्थापनमा चुक्दै गयौ भने के हुनसक्छ ?

यो गम्भीर प्रश्न हो । यसमा देशव्यापी वहस नै चलाउनुपर्ने हुन्छ । र राजनीतिक नेतृत्वहरुलाई पनि यो प्रश्न हरेकपल्ट सोध्नुपर्ने हुन्छ ।