जोर्डनविरुद्धको खेलमा नेपालले जितकै लागि प्रतिस्पर्धा गर्ने : प्रशिक्षक अलमुताइरी

काठमाडौं । नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीले विश्वकप छनोट अन्तर्गत जोर्डनविरुद्धको खेलमा नेपालले जितकै लागि प्रतिस्पर्धा गर्ने बताएका छन् ।

खेलको पुर्वसन्ध्यामा आज आयोजित पत्रकार सम्मेलनमा नेपाली प्रशिक्षक अलमुताइरीले जोर्डनविरुद्ध नेपाली टिमले जित निकाल्न सक्दो प्रयास गर्ने बताए । कुवेतमा रहेको नेपाली फुटबल टोलीले विश्वकप छनोट अन्तर्गत भोलि राति जोर्डनसंग प्रतिस्पर्धा गर्दैछ ।

नेपालको लक्ष्य एसिया कपमा छनोट हुने रहेको भन्दै उनले त्यसका लागि जोर्डनलाई हराउन आवश्यक रहेको बताए । विश्वकप छनोट अन्तर्गत अलमुताईरीको पहिलो औपचारिक प्रतियोगितामा नेपालले चाइनिज ताइपेइविरुद्ध २–० को जित निकालेको थियो । पत्रकार सम्मेलनमा जोर्डनका प्रशिक्षक वाइटल बोर्केलमान्सले नेपाली टिमको खेलमा निकै फरक आएको बताए ।