चुनावपछि सत्ता गठबन्धनका दलहरु हराएर जानेछन् – एमाले अध्यक्ष ओली

काठमाडौं । पूर्वप्रधानमन्त्री एवं नेकपा एमालेका अध्यक्ष केपी शर्मा ओलीले आगामी चुनावपछि सत्ता गठबन्धनका दलहरु हराएर जाने तर्क गरेका छन् ।

एमाले निकट कर्मचारी संगठनको काठमाडौंमा आयोजित एक कार्यक्रममा आज(शनिबार)सम्बोधन गर्दै उनले गठबन्धन दलहरु फ्रिजबाट निकालिएका आइसका डल्ला जस्तै विलाएर जाने जनाए ।

उनले अबको १४ महिनामा सत्ता गठबन्धनमा रहेका दलहरु हराउने दावी गरे । ओलीले १४ महिनापछि अनिवार्य चुनाव गराउनु पर्नेमा जोड दिएका छन् ।

उनले जनादेशमा जाँदा संविधान मिच्दै प्रतिगमन उन्मुख भएको भन्ने आरोप लगाउनु गलत हुने जनाए ।

एक अर्को प्रसंगमा अध्यक्ष ओलीले निजामती कर्मचारीले निष्पक्ष भएर सेवा प्रवाह गर्नुपर्ने बताए । कुनै पार्टीको सदस्य भएर नभई राष्ट्रसेवक कर्मचारीको हैसियतले निष्पक्ष रुपमा सेवा प्रवाह गर्नुपर्नेमा उनको जोड छ ।