बुधबार, जेठ १६, २०८१

‘बी’ डिभिजन लिग : मध्यपुरमाथि बाँसबारीको फराकिलो जित

नेपालखोज २०७८ फागुन २८ गते १९:३३

काठमाडौं । राजेश पौडेलको ह्याट्रिकको सहयोगमा बाँसबारी क्लबले राजधानीमा जारी सहिद स्मारक ‘बी’ डिभिजन लिग फुटबलमा मध्यपुर युथ एसोसियसनमाथि ६–० को फराकिलो जित निकाल्दा अर्को खेलमा वीरगञ्ज युनाईटेड र रानीपोखरी कर्नर टिम (आरसिटी) ले २–२ गोलको बराबरी खेलेका छन् ।

ललितपुर स्थित अखिल नेपाल फुटबल संघ (एन्फा) मुख्यालयको मैदानमा सम्पन्न दिनको पहिलो खेलमा बाँसबारीले मध्यपुरमाथि आधा दर्जन गोल गरेको हो । एक तर्फी जस्तो भएको खेलमा बाँसबारीले पहिलो हाफमा एक गोल गर्दा दोस्रो हाफमा थप पाँच गोल गर्न सफल भएको थियो । बाँसबारीले २३औं मिनेटमा सञ्जय धिमालले गोल गर्दै सुरुआती अग्रता दिलाएका थिए ।

त्यसपछि ६२औं मिनेटमा दोस्रो गोल गर्दा राजेश पौडेलले ५१ औं, ६४ औं र ७८ औं मिनेटमा गोल गरेर ह्याट्रिक पूरा गरेका थिए । त्यस अघि ७१औं मिनेटमा सुलेमान थापा मगरले गोल गरेका थिए । एकतर्फी जस्तो भएको खेलमा मध्यपुर बाँसबारीविरुद्ध निकै निरिह बनेको थियो ।

जितसँगै बाँसबारीले चार खेलबाट तालिकामा ४ अंक जोड्दा फराकिलो हार भोगेको मध्यपुरको समान चार खेलबाट ३ अंक छ । बाँसबारीले जारी लिगमा पहिलो जित निकाल्दा मध्यपुरले दोस्रो हार भोगेको छ । बी डिभिजन लिग अन्तर्गत आजकै अर्को खेलमा वीरगञ्ज युनाईटेड र रानीपोखरी कर्नर टिम (आरसिटी) ले २–२ गोलको बराबरी खेलेका हुन् ।

वीरगञ्जले पहिलो हाफमा लिएको अग्रतालाई कायम राख्न नसक्दा आरसिटीसँग अंक बाँडेको हो । ३३ औं मिनेटमा विज्ञान चौधरीले गोल गर्दै वीरगञ्जलाई अग्रता दिलाएका थिए । तर, ४१ औं मिनेटमा अमर डंगोलले गोल गर्दै आरसिटीलाई १–१ गोलको बराबरीमा फर्काएका थिए । पहिलो हाफको इन्जुरी समयमा वीरगञ्जले कृपाकान्त महतो थारुको गोलबाट पुन अग्रता बनाए पनि ८३ औं मिनेटमा अमरले व्यक्तिगत दोस्रो गोल गर्दै आरसिटीलाई २–२ गोलको बराबरीमा ल्याउदै हारबाट जोगाउन सफल भए ।

यस बराबरीसँगै आरसिटीले ४ खेलमा ५ अंक जोडेको छ । वीरगञ्जले ४ खेलमा ५ अंक नै जोडेको छ । यस्तै तीन खेलबाट तालिकामा शीर्षता कायम गरेको चर्चब्वाईजले आज श्री कुमारी क्लबसँग १–१ गोलको बराबरी खेलेको छ । अघिल्ला तीन खेलमा स्पष्ट जित निकालेको चर्च ब्वाईजले ४७ औं मिनेटमा लिएको अग्रता कायम राख्न नसक्दा कुमारीसँग अंक बाँडेको हो ।

चर्चब्वाईजका लागि आशिष चापागाईले गोल गर्दै टोलीलाई अग्रता दिलाएका थिए । त्यसपछि खेलमा फर्किन प्रयास गरेको कुमारीले ५५ औं मिनेटमा बराबरी गोल फर्कायो । निरबहादुर आलेले गोल गर्दै टोलीलाई खेलमा फर्काएका थिए । बाँकी सयमा थप गोल हुन सकेन र दुबैले अंक बाँडे ।

प्रतिक्रिया