‘आरआरआर’पछि भारतीय फिल्म ‘केजीएफ–२’ मा दर्शकको बाढी !

काठमाडौं । भारतीय फिल्मले नेपाल र भारतमा सुनामी नै ल्याइरहेका छन् । दर्शकको माया र साथ पाएपछि उनीहरु हौसिएका छन् । कोभिडले थिलथिलो भएको मनोरञ्जन क्षेत्र हौसिएको र भारतको अर्थतन्त्र नै चलायमान भएको छ । मार्च महिनामा दुई ठूला फिल्मले भारतभर हंगामा ल्याएको छ । बक्स अफिसमा कब्जा नै गरेको छ । बलिउडको ‘द कश्मीर फाइल्स’ र दक्षिण भारतीय (साउथ) फिल्म ‘आरआरआर’ले कतिपय पुराना रेकर्ड नै तोडेको छ । कोरोना महामारीले थिलथिलो बनाएको फिल्म उद्योगमा यी दुई फिल्मले खुशी फर्काएको छ । यस्तै यो सिलसिलालाई निरन्तरता दिन आउँदैछ, ।

अर्को साउथ फिल्म ‘केजीएफ च्याप्टर – २’ ।

‘केजीएफ–२’ले पनि दर्शकको बक्स अफिसमा सुनामी ल्याउने संकेत देखाएको छ । अप्रिल १४ बाट विश्वव्यापी रुपमा रिलिज हुन लागेको ‘केजीएफ–२’ले बक्स अफिसमा दर्शकको बाढी ल्याउने अनुमान गरिएको हो । अहिलेदेखि आक्रामक रुपमा अग्रिम टिकट बुकिङ भइरहेको यो फिल्मले विभिन्न रेकर्ड राख्ने अपेक्षा गरिएको छ । ‘केजीएफ–२’का निर्माता पनि फिल्मबाट धेरै आशावादी देखिन्छन् । सन् २०१८ मा आएको ‘केजीएफ’को पहिलो भागले बलिउड सुपरस्टार शाहरुख खान स्टारर ‘जिरो’लाई नाजुक अवस्थामा पु¥याइदिएको थियो । त्यसबेला धेरै होहल्लाविना नै यो फिल्मले बक्स अफिसमा राम्रो कमाइ गरेको थियो । सुरुमा ‘केजीएफ’का नायक यशको धेरैले खिल्ली उडाएका थिए । तर पछि फिल्म चल्न थालेपछि बक्स अफिसमा सबैलाई छक्क पार्दै अप्रत्याशित नतिजा ल्यायो । शाहरुखको ‘जिरो’लाई पन्छाउँदै दर्शकको मन जित्यो ।

अहिले प्रदर्शनको सम्मुखमा रहेको ‘केजीएफ(२’लाई लिएर दर्शकहरु उत्साहित छन् । यो फिल्मको निर्माण टिमले प्रचारप्रसार तीव्र बनाएको छ । यो फिल्मको टिकट बुकिङ र चर्चा हेर्दा यसले फिल्म बजारमा कब्जा नै जमाउने अड्कलबाजी भइरहेका छन् । भारतीय बजारमा यसले धेरै रेकर्ड तोड्ने, नयाँ बेन्चमार्क सेट गर्ने र फिल्म उद्योगलाई पीडाको भूमरीबाट मुक्त गराउने विश्लेषकहरुको आँकलन छ ।

‘केजीएफ’: एक केस स्टडी
‘द कश्मीर फाइल्स’ मनोरञ्जन उद्योगको लागि एउटा केस स्टडी हो । यसले साउथ स्टार प्रभासको ‘राधेश्याम’ र बलिउड स्टार अक्षय कुमारको ‘बच्चन पाण्डे’लाई पनि पछि पारेर बक्स अफिसमा आफ्नो दबदबा कायम गर्यो । यसपछि प्रदर्शनमा आएको साउथ फिल्म ‘आरआरआर’ले त विश्वव्यापी रुपमा एक हजार करोड भारुभन्दा बढी कमाइ गरिसकेको छ । अब ‘केजीएफ(२’ले अर्को रेकर्ड राख्ने देखिएको छ ।

‘महाराजामौली’

रामचरण र जुनियर एनटीआर स्टारर ‘आरआरआर’को सफलताको पार्टीमा निर्देशक एसएस राजामौली र उनकी पत्नी रमालाई उनका साथीहरुले अब राजामौली होइन महाराजामौली भनेर सम्बोधन गर्ने बताएका थिए । त्यसको कारण थियो, नम्र निर्देशकले सधैंभरि बक्स अफिसमा देखाउने धमाका । उनी निर्देशित सबै फिल्मले बक्स अफिसमा राम्रो प्रशंसा कमाएका छन् । बाहुबली, बाहुबली(२ र हाल प्रदर्शनरत् ‘आरआरआर’बाट उनको ब्राण्डले अर्को उचाइ तय गरेको छ । दक्षिण भारतीय अभिनेताहरु हुन् प्रभास, अल्लु अर्जुन, रामचरण, जुनियर एनटीआर र यश उत्तर भारतमा समेत चर्चित छन् । यस्ता चम्किला अभिनेता र कुशल निर्देशकका कारण अहिले साउथ फिल्म उद्योग यो अवस्थामा पुगेको छ ।