इन्डियन आइडल विजेता पवनदीप नेपाल आउँदै

काठमाडौं । भारतीय चर्चित तथा युवा माझ रुचाइएका गायक इन्डियन आइडल २०२१ विजेता पवनदीप राजन काठमाडौं आउने भएका छन् । काठमाडौंमा प्रस्तुति दिनका लागि चर्चित गायक पवनदीप नेपाल आउने भएका हुन्। ३६५ इभेन्टस् एण्ड मिडियाले म्यानेज गर्ने सांगितिक कार्यक्रममा पवनदीपले दुई स्थानमा आफ्नो प्रस्तुती दिनेछन्।

डिस्ट्रिक्ट अवार्ड एण्ड रिकग्निसन कमिटी २०–२१ रोटरी इन्टरनेशनल डिस्ट्रिक्ट ३२९२ नेपाल -भुटानले आयोजना गरेको अवार्ड सेरमोनी कार्यक्रममा चर्चित गायक पवनदीपले काठमाडाैंको पाँचतारे होटेल याक एण्ड यति दरबारमार्ग काठमाडौंमा आफ्नो सांगितिक प्रस्तुती रहने जनाइएकाे छ ।

साथै वैशाख ११ गते रोटरी क्लब अफ पाटन वेस्टले आयोजना गरेको सांस्कृतिक कार्यक्रममा चर्चित गायक पवनदीपलाई ठमेलको लर्ड अफ ड्रिंक्स (एलओडी) मा सुन्न सकिने छ । कार्यक्रमका लागि दुई थरीको टिकटको व्यवस्था गरिएको आयोजकले जानकारी दिएको छ ।

आयोजकका अनुसार २५ सय र ३ हजार रुपैयाँका दरले टिकट राखिएको र उक्त टिकटबाट उठेको रकम रोटरी क्लबले सामाजिक कार्यका लागि सहयोग गर्ने आयोजकले जनाएको छ । टिकट विभिन्न माध्यमबाट उपलब्ध हुने समेत जानकारी आयोजकले दिएको छ । अनलाइन टिकटका लागि भुक्तानी प्रदायक आइ एमई पे वालेट मार्फत खरिद गर्न सकिने आयोजकले जनाएको छ ।

आयोजकका अनुसार काठमाडौंको विभिन्न स्थानहरु जस्तै लुना रेष्टुरेण्ट एण्ड बार ठमेल, लर्ड अफ ड्रिंक्स ठमेल, मोजो बुटिक होटेल बानेश्वर, लोकल रेष्टुरेण्ट मध्य बानेश्वर, रोयल एम्पायर बुटिक होटल बालुवाटारबाट समेत टिकट लिन सकीने छ । पवनदीप राजन इन्डियन आइडल सन् २०२१ सिजन १२ का विजेता हुन् ।

उक्त सांगितिक कार्यक्रम विभिन्न राष्ट्रिय अन्तर्राष्ट्रिय ब्राण्ड / कम्पनीले प्रायोजन गरेका छन् । कोरोनाको कारणले स्थगित पवनदीपको सांगितिक कार्यक्रम यसपटक भने भव्य रुपमा सफल हुने आयोजकले बताएको छ । चर्चित गायक पवनदीपले विभिन्न धार्मिक स्थलको समेत अवलोकन गर्ने आयोजकले जानकारी दिएको छ ।