स्थानीय तह निर्वाचनका लागि आज र भाेलि उम्मेद्वारी दर्ता गर्न निर्वाचन आयोगकाे अपिल

काठमाडौं । निर्वाचन आयोगले आज र भाेलि (११ र १२) स्थानीय तह निर्वाचनमा उम्मेद्वारी दर्ता गर्न राजनीतिक दल र सरोकारवाला निकायलाई अपिल गरेको छ ।

निर्वाचन आयोगले हिजाे गरेको नियमित पत्रकार भेटघाट कार्यक्रममा बोल्दै आयोगका प्रवक्ता शालिग्राम शर्मा पौडेलले वैशाख ११ र १२ गते बिहान १० बजेदेखि साँझ ५ बजेसम्म वैशाख ३० गतेदेखि हुने स्थानीय तह निर्वाचनका लागि सम्बन्धित निर्वाचन अधिकृतको कार्यालयबाट उम्मेद्वारी दर्ता गर्न आह्वान गरेका हुन् ।

आयोगले निर्वाचनमा योग्यता पुगेका सबै मतदाताहरुलाई रुचाएको पदमा उम्मेद्वारी दिन सक्ने वातावरण बनाई दिन पनि सबै राजनीतिक दल, नेपाल सरकार, प्रदेश सरकार, स्थानीय तह, स्थानीय प्रशासन, सुरक्षा निकाय, नागरिक समाज, आम सञ्चार क्षेत्रलगायत सबै सरोकारवालालाई आग्रह गरेको छ ।

उम्मेद्वारी मनोनयनमा चाप पर्न नदिन दुई दिन उम्मेद्वार मनोनयनका लागि समय दिइएको पनि आयोगले स्पष्ट पारेको छ । आयोगका प्रवक्ता पौडेलले २०७४ सालको स्थानीय तह निर्वाचनमा एकैदिन मनोनयन गर्दा अत्याधिक चाप देखिएकाले त्यसो हुन नदिन यो पटक दुई दिनको समय दिनु परेको बताए ।

निर्वाचन आयोगले पत्रकार भेटघाट कार्यक्रममा वैशाख १६ गते उम्मेद्वारको अन्तिम नामावली प्रकाशित गर्ने र १७ गते भोलिपल्ट उम्मेद्वारहरुलाई चुनाव चिन्ह प्रदान गर्ने आयोगको निर्वाचन कार्यतालिकाबारे पनि स्मरण गराइएको छ ।

स्थानीय तह निर्वाचनलाई स्वच्छ, स्वतन्त्र र भयमुक्त वातावरणमा सम्पन्न गराउने विशेष जिम्मेवारी राजनीतिक दल र तिनका उम्मेदवारहरुको रहेको उल्लेख गर्दै आयोगका प्रवक्ता पौडेलले सोही जिम्मेवारी पूरा गर्न उनीहरु समक्ष हुने विश्वाससमेत व्यक्त गरे । आयोगले नेपालको संविधानले व्यवस्था गरेको महिलाहरुसहितको समावेशी समानुपातिक प्रतिनिधित्व सुनिश्चित हुने गरी निर्वाचनमा उम्मेदवारी तय गर्न संवेदनशील भईदिन पनि राजनीतिक दलहरुलाई सचेत गराएको छ ।

आयोगले निर्वाचन आचारसंहिताको पूर्ण पालना गर्न पनि राजनीतिक दलहरु र तिनका उम्मेदवारहरुको गम्भिर ध्यानाकर्षण गराएको छ । अन्यथा कारबाहीको भागीदार बन्नुपर्ने आयोगका प्रवक्ता पौडेलले बताए ।