कांग्रेसले देशभर चुनावी सभा गर्ने

काठमाडौं । नेपाली कांग्रेसले स्थानीय तह निर्वाचन केन्द्रित देशका विभिन्न स्थानमा चुनावी सभा गर्ने भएको छ । उक्त चुनावी सभालाई प्रधानमन्त्री तथा नेपाली कांग्रेस सभापति शेरबहादुर देउवासहित शीर्ष नेताहरूले सम्बोधन गर्ने छन् ।

कांग्रेस स्थानीय तह निर्वाचन केन्द्रीय परिचालन समितिको निर्णयअनुसार देशका सातै प्रदेशका विभिन्न स्थानमा सभा गर्ने तयारी छ । चुनावी सभामा सभापति देउवासहित पदाधिकारी र केन्द्रीय नेताहरुले सम्बोधन गर्ने मुख्यसचिव कृष्णप्रसाद पौडेलले जानकारी दिए ।

कांग्रेसले वैशाख २१ गते बुधबार विराटनगरमा सभा गर्नेछ । उक्त सभामा सभापति देउवा, नेता रामचन्द्र पौडेल र महामन्त्री विश्वप्रकाश शर्माले सम्बोधन गर्ने छन् । वैशाख २२ मा चितवनमा सभा हुनेछ । उक्त सभामा सभापति देउवा, नेता पौडेललगायत नेताले सम्बोधन गर्ने छन् ।

वैशाख २३ गते काठमाडौंमा हुने चुनावी सभालाई सभापति देउवासहित अन्य शीर्ष नेताले सम्बोधन गर्ने छन् । वैशाख २४ मा बुटवल, तनहुँको दमौली र जनकपुरमा सभा हुने कांग्रेसले जनाएको छ । सो सभामा सभापति देउवा, नेता पौडेल, महामन्त्री गगन थापालगायत वक्ता रहने छन् । वैशाख २५ गते पोखरा र दाङमा, वैशाख २६ गते कैलालीको धनगढीमा र २७ गते डडेल्धुरामा सभा हुनेछ ।