राष्ट्रसंघले भन्यो- इथियोपियाका लागि मल र बीउ आवश्यक

काठमाडौं । संयुक्त राष्ट्रसंघले इथियोपियाका लागि तत्कालै खाद्यान्नका साथै बीउ र मलको आवश्यकता रहेको जनाएको छ भने, सहयोगका लागि सबै राष्ट्रहरु समक्ष अपिल पनि गरेको छ ।

लामो समयदेखि इथियोपियाका कतिपय स्थानहरुमा खडेरी परेको र द्वन्द्वका कारण यहाँ खेतीयोग्य जमिनमा पनि खेती हुन नसकेको अवस्थामा संयुक्त राष्ट्रसंघले सहयोगका लागि अपिल गरेको हो ।

इथियोपियाको उत्तरी क्षेत्र द्वन्द्वका कारण ग्रस्त रही आएको छ । सो क्षेत्रमा आगामी हप्तादेखि मनसुन सुरु हुन लागेकाले त्यस अगावै आवश्यक बीउ र मलको खाँचो रहेको संयुक्त राष्ट्रसंघले जनाएको हो । त्यस क्षेत्रका खेतबारी लामो समयदेखि बाँझै रहेका छन् । जसका कारण यहाँका नागरिकलाई खाद्यान्नको खाँचो रहने गरेको छ ।

विशेष गरी यहाँको उत्तरी क्षेत्रका नागरिकलाई लामो समयदेखि मानवीय सहायताको खाँचो रहेको पाइएको छ । यहाँको द्वन्द्व समाधानका लागि भन्दै संयुक्त राष्ट्रसंघले लामो समयदेखि काम गर्दै आएको छ । तर द्वन्द्व पनि जारी रहेको छ भने उता खडेरीलगायतका समस्याले यहाँ खेती भएको छैन । सो क्षेत्रको सबैभन्दा बढी प्रभावित मानिएको टिगरे क्षेत्रका किसानलाई अझ बढी सहयोग चाहिएको बताइएको छ । –रासस