६ वटा प्रदेशकाे पहाडी क्षेत्रमा चटयाङसहित वर्षाको सम्भावना

काठमाडाैं । हाल नेपालमा स्थानीय वायु र भारतको विहार, पश्चिम बंगाल आसपास रहेको न्युन चापीय रेखाको सामान्य प्रभाव रहेको जल तथा माैसम पर्वानुमान महाशाखाले जनाएकाे छ । अहिले प्रदेश नं १, मधेश प्रदेश लगायत अन्य प्रदेशका पहाडी  भू-भागमा आंशिकदेखि सामान्य बदली रही बाँकी भू-भागमा मौसम सामान्यतया सफा रहेको छ भने प्रदेश नं १ र मधेश प्रदेशका एक/दुई स्थानमा हल्का वर्षाको भइरहेको विभागले उल्लेख गरेकाे छ ।

त्यस्तै, आज दिउँसाे प्रदेश नं १, वाग्मती प्रदेशमा, गण्डकी प्रदेश  र अन्य प्रदेशका पहाडी  भू-भागमा आंशिकदेखि सामान्य बदली रही अन्य भू-भागमा आंशिक बदलीदेखि मौसम सामान्यतया सफा रहनेछ भने प्रदेश नं १,वाग्मती प्रदेश,  गण्डकी  प्रदेश र लुम्बिनी प्रदेशका केही स्थानहरुका साथै कर्णाली प्रदेश र सुदूरपश्चिम प्रदेशका पहाडी भू-भागका एक-दुई स्थानहरूमा मेघ गर्जन / चटयाङसहित हल्कादेखि मध्यम वर्षाको सम्भावना रहेको विभागले जनाएकाे छ ।

त्यसैगरी, आज राति प्रदेश नं १, गण्डकी प्रदेश, लुम्बिनी प्रदेश र वाग्मती प्रदेशमा आंशिकदेखि सामान्य बदली रही अन्य प्रदेशमा आंशिक बदलीदेखि मौसम सामान्यतया सफा रहनेछ भने प्रदेश नं १, गण्डकी प्रदेश र वाग्मती प्रदेशका थोरै स्थानहरुमा साथै लुम्बिनी प्रदेश, कर्णाली प्रदेश र सुदूरपश्चिम प्रदेशका पहाडी भू-भागका एक-दुई स्थानहरूमा मेघ गर्जन / चटयाङसहित हल्कादेखि मध्यम वर्षाको सम्भावना रहेको विभागले जनाएकाे छ ।