शुक्रबार, चैत १६, २०८०

लौरो चिह्न स्वतन्त्रहरूको होइन: निर्वाचन आयोग

नेपालखोज २०७९ असोज ७ गते २०:१९

काठमाडौं । निर्वाचन आयोगले ‘हाम्रो नेपाल पाटी’ले लौरो चिह्नलाई स्वतन्त्रहरुको साझा अभियान भनेर जनतामा झुटा प्रचार गरिरहेको विषय प्रति पार्टी संयोजक अनन्तराज घिमिरेसँग स्पष्टिकरण माग गरेको छ। हाम्रो नेपाली पार्टीको लौरो चुनाव चिह्न आयोगको समानुपातिक सूचीमा दर्ता भएकोले उक्त लौरो चिह्न स्वतन्त्रहरुको नभएको निर्वाचन आयोगले बताएको छ।

काठमाडौं निर्वाचन क्षेत्र नम्बर ५ र ९ का स्वतन्त्र उमेदवार विजय कँडेल र सुनिल रिजालले गत आइतबार हाम्रो नेपाली पार्टीको नाममा दर्ता भएको लौरो चुनाव चिह्नको सम्बन्धमा प्रष्ट पारिदिन निर्वाचन आयोगमा उजुरी दर्ता गरेका थिए। सोही, उजुरीको आधारमा शुक्रबार आयोगले लौरो चुनाव चिह्न स्वतन्त्रहरुको हो भनि झुटा प्रचारप्रसार गरिएको भन्दै हाम्रो नेपाल पार्टीको संयोजक अनन्तराज घिमिरेलाई स्पष्टिकरण दिन निर्वाचन आयोगमा उपस्थित हुनको लागि निर्देशन दिएको छ।

स्थानीय निर्वाचनमा निर्वाचन आयोगले लौरो चिह्न स्वतन्त्र उम्मेदवारहरुलाई प्रदान गरेकोमा हाल सो चुनाव चिह्न स्वतन्त्र तथा वैकल्पिक शक्तिको लौरो अभियान स्वतन्त्रहरुको साझा चुनाव चिह्न लौरो भनेर विभिन्न संचार माध्यम तथा सामाजिक संजालहरुमा आइरहेको छ ।

उक्त चिह्न निर्वाचन आयोगमा दर्ता रहेको हाम्रो नेपाली पार्टी नामक राजनीतिक दललाई प्रदान गरेकोले उक्त चुनाव चिह्न स्वतन्त्रहरुको साझा तथा वैकल्पिक चिह्न भनेर जनमानसमा भ्रम सिर्जना गर्ने कार्य भइरहेको हुँदा सो चिह्न खारेजीको माग गर्दै काठमाडौं निर्वाचन क्षेत्र नम्बर ५ का स्वतन्त्र उमेदवार विजय कँडेल र काठमाडौं क्षेत्र नम्बर ९ का स्वतन्त्र उमेदवार सुनिल रिजालले निर्वाचन आयोगमा उजुरी दर्ता गरेका थिए।

निर्वाचनमा खडा भएका स्वतन्त्र उम्मेदवारलाई प्रदान गरिने निर्वाचन चिह्न उम्मेदवारी मनोनयन भइ सकेपछिको सबै कानुनी प्रक्रिया पूरा गरी निर्वाचन अधिकृतले कानुन बमोजिम प्रदान गर्ने हुँदा सो कार्यविधि नै पूरा नभएको अवस्थामा स्वतन्त्र उम्मेदवारको लौरो निर्वाचन चिह्न भनी प्रचार गरेको कार्य कानुन सम्मत नदेखिएको दललाई प्रदान गरिएको निर्वाचन चिह्न स्वतन्त्र उम्मेदवारको निर्वाचन चिह्नको समूहमा नरहने र उम्मेदवारहरुलाई प्रदान गर्न नसकिने हुँदा दलको नामबाट लौरो चिह्न प्रयोग नगरी स्वतन्त्र तथा वैकल्पिक शक्तिको लौरो अभियान स्वतन्त्र उम्मेदवार भनी प्रचार प्रसार गरेको कार्य निर्वाचनको स्वच्छ प्रतिष्पर्धाको सिद्धान्त विपरीत देखिएको र यसले आम जनमानसमा भ्रम तथा अन्यौलता सिर्जना गर्ने भएकोले त्यस्ता भ्रामक कुराहरु प्रचार प्रसार नगर्न नगराउन र विभिन्न सामाजिक सञ्जालमा स्वतन्त्र उम्मेदवारको लौरो चिह्न भनी राखिएका सामाग्री तुरुन्त हटाउनुका साथै तीन दिन भित्र आयोगमा स्वयं उपस्थित भई स्पष्टिकरण पेश गर्न आयोगले हाम्रो नेपाली पार्टीको संयोजक अनन्तराज घिमिरेलाई निर्देशन दिएको छ।

‘हाम्रो नेपाल पाटी’ लौरो चिह्न को संयोजक अनन्तराज घिमिरेलाई निर्वाचन आयोगले स्पष्टिकरण दिन सोधेका प्रश्नहरु:

१.प्रतिनिधि सभा सदस्य निर्वाचन ऐन, २०७३ को दफा (६) र प्रदेश सभा सदस्य निर्वाचन ऐन, २०७३ को दफा (६) मा पहिलो हुने निर्वाचित हुने निर्वाचन प्रणालीतर्फ स्वतन्त्र उम्मेदवारलाई आयोगले निर्धारण गरेको प्रदान गरिएको निर्वाचन चिह्नको समूहबाट तोकिएको बमोजिमको तरिका अनुसार निर्वाचन अधिकृतले निर्वाचन चिह्न प्रदान गर्नैछ भन्ने कानुनी व्यवस्था रहेकोमा तपाईको दललाई प्रदान गरिएको निर्वाचन चिह्न लौरो तपाईं दलको अध्यक्ष अनन्तराज घिमिरे लगायतका व्यक्तिहरुले स्वतन्त्र उम्मेदवारको रुपमा प्रचार प्रसार गरेको देखिएकोले के कुन आधारमा स्वतन्त्र उम्मेदवारको चिह्न हो भनी प्रचार प्रसार गर्नु भएको हो ?

२. तपाईको दल निर्वाचन आयोगमा निर्वाचन प्रयोजनका लागि दर्ता भई समानुपातिक निर्वाचन प्रणालीर्तफको बन्दसूची समेत पेश गरी निर्वाचन चिह्न लौरो समेत प्रदान गरिसकिएकोमा लौरी चिह्न स्वतन्त्रको हो र म स्वतन्त्र उम्मेदवार हु भनी के कुन आधारमा प्रचार प्रसार गर्नु भएको हो ? त्यसरी स्वतन्त्र उम्मेदवार भनी प्रचार प्रसार गर्न मिल्ने हो होइन ?

३. प्रतिनिधि सभा सदस्य निर्वाचन ऐन, २०७३ को दफा (३) र प्रदेश सभा सदस्य निर्वाचन ऐन, २०७३ को दफा (३) मा आयोगले राजनीतिक दल वा उम्मेदवारलाई निर्धारण गरिएको निर्वाचन चिह्न दलका उम्मेदवार वा दल बाहेक अरु कसैले पनि प्रयोग गर्न पाउने छैन भन्ने कानुनी व्यवस्था रहेकोमा लौरो चिह्न स्वतन्त्र उम्मेदवारको चिह्न हो भनी प्रचार प्रसार गर्ने अधिकार तपाईं र तपाईंको दललाई कुन कानुनले प्रदान गर्यो ?

४. दलको चिह्न स्वतन्त्र उम्मेदवारको चिह्न हो भनी प्रचार प्रसार गर्ने कार्य कानुन विपरीत भई यस्ता भ्रामक कार्यले मतदाता र सर्वसाधरणमा अन्यौलता सिर्जना गरी स्वच्छ निर्वाचनमा प्रतिकूल प्रभाव पार्ने हुँदा तपाई र तपाईंको दललाई कारवाही किन नगर्ने ?

प्रतिक्रिया