विश्वकप फुटबल-२०२२ : कतारमा कोठा पाउनै मुस्किल

काठमाडाैं । विश्वकप फुटबल-२०२२ नोभेम्बर २० देखि १८ डिसेम्बरसम्म हुने सबैभन्दा ठूलो फुटबल प्रतियोगितामा सहभागी हुन १५ लाखभन्दा बढी फुटबल प्रेमि कतार पुग्न सक्नेछन् । १० लाख पाहुना यो सानो खाडी देशका लागि निकै ठूलो संख्या हो । विश्वकपका कारण दोहामा घर र अपार्टमेन्टको भाडा निकै बढेको छ । विश्वकपबाट पैसा कमाउन अहिले धेरै घरधनीहरूले आफ्ना भाडामा लिनेहरूलाई घर खाली गर्न भनेका छन्, त्यो पनि केही दिनको सूचनामा ।

रिम विदेशी कामदार हुन् र उनी कतारको एउटा ठूलो कम्पनीमा काम गर्छिन् । आफ्नो परिचय लुकाउन अर्को नाम प्रयोग गर्ने रिमले एएफपी समाचार एजेन्सीलाई केही दिनभित्रै आफ्नो घर छोड्नुपर्ने बताएकी छिन् । त्यो घर एउटा अपार्टमेन्ट भवनमा थियो । रियल इस्टेट कम्पनीले विश्वकप फुटबलका लागि भवन भाडामा दिन चाहेकाले धेरैलाई घर खाली गर्न लगाइयो । ‘हामीले अपमानित महसुस गर्यौं,’ रिम भन्छिन् । रेमको कम्पनीले उनलाई होटेलमा राखेको छ । विश्वकप सुरु हुनुअघि नै होटेल छोडेर अस्थायी अपार्टमेन्टमा बस्नु पर्ने उनको भनाइ छ, ‘घर छाडेर सबै कुरा झोला र बक्समा राखेर होटलको कोठामा बस्नु दुःखद कुरा हो ।

कतारमा भाडामा बस्ने अरु थुप्रै मानिसहरुले पनि समाचार एजेन्सी एएफपीलाई आफ्नो अनुभव सुनाएका छन् । धेरै जसो मानिसलाई ‘उच्च भाडा तिर्न वा खाली गर्न’ भनिएको छ । रीम बस्ने टावर अब Booking.com मा प्रति रात १,७०० यूएस डलरमा उपलब्ध छ विश्व कपको समयमा न्यूनतम १४ दिनको बसाइका लागि । रिम दुई वर्षदेखि उक्त टावरमा बस्दै आएकी थिइन्, प्रति महिना २,५०० युएस डलर भाडा तिरेर । विश्वकप खेल्न आउने अधिकांश फुटबलप्रेमिहरू अपार्टमेन्ट र होटेलका साथै क्रूज जहाज र मरुभूमिमा बनाइएका शिविरहरूमा बस्नेछन् । कतारको आधिकारिक विश्वकप पोर्टलमार्फत पनि कोठा बुकिङ भइरहेको छ । कतारको कुल जनसंख्या २८ लाख छ ।

आयोजकहरूले बारम्बार फुटबल प्रशंसकहरूका लागि पर्याप्त ठाउँ हुने दाबी गर्दै आएका छन् । अहिले कतार सरकारले पनि विश्वकपका कारण छानाको माग निकै बढेको स्वीकार गरे पनि भाडामा लिनेलाई निष्कासन गर्ने विषयमा भने कुनै प्रतिक्रिया दिएको छैन । एक सरकारी अधिकारीका अनुसार “कुनै पनि भाँडादारले भाडा विवाद समाधान समितिको कार्यालयमा उजुरी गर्न सक्छ।” यो अभावबाट बच्न फिफाले हजारौं होटल कोठा खुला गरेको छ । यी कोठाहरू फिफा द्वारा आरक्षित थिए तर अब फिफाले यसलाई सस्तो र पहुँचयोग्य बनाउन आफ्नो आरक्षण रद्द गरेको छ । केही फुटबल प्रेमिहरू स्टेडियमहरू नजिकैका गगनचुम्बी भवनहरूमा लक्जरी अपार्टमेन्टहरू खोजिरहेका छन् । Airbnb वेबसाइटमा दुई व्यक्तिका लागि यस्तो अपार्टमेन्टको भाडा प्रति रात २,५ ०० यूएस डलर पर्ने कुरा उल्लेख छ ।

पूरै विश्वकपको अवधिमा २९ दिनको लागि भिल्ला बुकिङको लागत कम्तिमा १३,००० यूएस डलर छ र यो मूल्य आगामी दिनहरूमा अझ बढ्न सक्छ । दोहाका कतिपय घरधनीले आफ्नो फ्ल्याट भाडामा दिएर एक महिनाका लागि कतारबाट बाहिरिने निर्णय गरेका छन् । भाडामा लिने घरको ठेक्का नोभेम्बर-डिसेम्बर महिनामा नवीकरण गरिन्छ। कतारको कानुनअनुसार भाडा नवीकरण गर्दा १० प्रतिशतले भाडा बढाउन सकिन्छ । कतारको अन्तर्राष्ट्रिय परामर्श कम्पनी भलुस्ट्रातका अनुसन्धान प्रमुख अनुम हसन भन्छन्, ‘गत एक वर्षमा दोहाका विभिन्न क्षेत्रमा ४० प्रतिशत बढी मूल्यमा लीज नवीकरण गरिएको छ ।

दोहामा तैनाथ एक विदेशी कूटनीतिज्ञका अनुसार, ‘उनको दूतावासका कर्मचारीहरूले पनि तलब वृद्धिको माग गरेका छन् ताकि उनीहरूले भाडा तिर्न सकून्।’ ५९ वर्षीय लेबनानी अमेरिकी नबिल घोरा दोहाको पर्ल जिल्लामा बस्छन् । घोरा भन्छन्, ‘केही समयका लागि घर-कोठा भाडा महँगो हुने भएको छ। मलाई लाग्छ कि मानिसहरूले अवसरको फाइदा उठाइरहेका छन्, तर यो विश्वमा जताततै हुन्छ, त्यो पनि फुटबल विश्वकप जस्तो कार्यक्रमको बेला ।’ स्रोत : एएफपी